Kikkut qanoq salloqittaanersut takukkit
Sermitsiaq.AG taakkununnnga ilaavoq. Siumup siulittaasuata, Naalakkersuisullu siulittaasuata Kim Kielsenip siornatigut naalakkersuisut siulittaasorisimasaannik Aleqa Hammondimik siunnersorteqalersimanera tassani allaaserineqarpoq.
- Aleqa Hammond, ullutsinni politikerini pikkorinnerpaat ilagaat. Marsip aqqaneq-aappaanni 2013-imi qinersisoqarmat 6.818-inik qinerneqarnerata takutippaa politikkikkut qanoq piginnaasaqartigisoq. Piginnaasaalu atorluartariaqarput. Aamma tuluttut attaveqatigiissinnaaneq pikkoriffigaa, tamannalu Pituffimmut tunngasunik isumaqatigiinniarnitsinni iluaqutigissavarput, Kim Kielsen taama oqarsimasutut Sermitsiaq.AG-mit issuarneqarpoq.
Namminerlu Naalakkersuisut siulittaasuattut inissinnerminut Aleqa Hammond pissutaasoq qujassutigalugu:
- Taannaqanngikkaluarpat ullumi Naalakkersuisuni siulittaasuusimassanngikkaluarpunga, Kim Kielsen Sermitsiaq.AG-mut oqarsimaneragaavoq.
Siumumi ilaasortaq nutaaq
Demokraatillu siusinnerusukkut siulittaasorisimasaat Jens B. Frederiksen Facebookikkut ullumi apriilip ulluisa aallaqqaataanni aamma allaaserisaqarpoq, Siumumut ilaasortanngorsimanini ilaatigut nalunaarutigalugu. Salloqittaavimmulli atatillugu tamanna allaaserineqarsimanersoq suli nalunarpoq.
Danmarkimi aviisi Ekstrabladet Salloqittaavimmi aamma allaaserisaqarpoq, Dronningip uiata Prins Henriup 20 koruunini assitaalernissaa oqaluttuaralugu. Ataqqinartorsuup Dronning Margrethep apriilip 16-ianni 75-iliinissaanut atatillugu 20 koruunip saqqummersinneqarnissaa oqaluttuaralugu. Taanna uani atuarneqarsinnaavoq.
Danmarkimi angutit isikkamik arsaallutik nunanut allanut unammisartuisa arnamik siullerpaamik sungiusaasoqalernissaat, aviisi Berlingskep oqaluttuaraa, arnat suliniaqatigiiffiisa tamanna ukiorpassuanngortuni piumasarisaat taamaalilluni piviusunngulersoq allaaserineqarluni.
Aamma atuaruk Qimussit illerngi qimmit anaqaqqusaajunnaassapput
Nunatsinnut uterutta oqaluttuarisinnaavarput uagut Radioaviisimi oqaluttuarigatsigu qimussertartut qimmitik illinerni anaraangata, anaat puussianut ikiorartalissagaat.
Oqaluttuaq taanna aamma ilumuuinnersoq misissortariaqanngilarluunniit.
