Kikkut pillugit siarngit sianerpat?

Ataasinngorpat juunip aallaqqaataanni - Ontariomiittuumi illoqarfimmi Sudbury-mi anglikanskit oqaluffiata siarngi sianerlutik aallartissapput, 1.122-riarlutillu sianissallutik. Siarngup kasunnera ataaseq tassaavoq ukiuni kingullerni Inuit, indianerit metisillu arnartaasa Canadami toqutaasimanngikkunik tammarsimasunut tunngatitaq.

Siarngit akunnerit ilivitsunngorneri tamaasa kasuttassapput, sapaatip akunnerata ullui tamaasa, taamaallaat sapammi aqqarngup sisamallu akornanni pinnatik.

Siarngit sianertittarnissaasa ulloq aallartiffissaat nalaatsornerinnaanngilaq. Juunip aallaqqaataami tassaavoq canadami Eqqortussaq Saammaateqatigiinnissarlu pillugu Ataatsimiititaliap ukiorpassuarni sulereerluni naggataarnersiorfissaa.

Sudburymi oqaluffimmit oqaaseqartartoq aviisimut Sudbury Starimut oqarpoq, oqaluffiup siarngisa sianertinnissaannut pissutaasoq tassaammat oqaluffiup taassuma nunap inoqqaavisa arnartaannut misiginneqataanera, naapertuilluartullu anguneqarnissaanik sorsuuteqarnerannut tapersersuinera ersertikkusullugu. Aammalu nunap inoqqaavisa suliniaqatigiiffippassuisa sorsuutaat tassa;  nuna tamakkerlugu arnarpassuit tammarsimasut pillugit misissuisoqalernissaanik piumasaqarnerat tapersersoramikku.

Arnarpassuit tammarsimasut pillugit Canadami naalakkersuisut misissuititserusunngillat. Canadamili innuttaasut paasilerpaat arlaannik ajortoqavissoq. Piffissalli ingerlanerani ajornartorsiut ilungersunartoq pillugu eqiingaffigineqaleriartorpoq.

Naalagaaffiup tv-qarfia CBC sapaatit akunnikkaartumik arnat pillugit maanna aallakaatitassiortarpoq, aviisersuillu marluk National Post aamma Globe and Mail tamanna pillugu sammisaqarsimallutik.

Siarngit kasuttarneri 1122-eriarlutik ataasinngorpat kasuttarlutik aallartippata naatsorsuutigineqarpoq juunip 20-iata tungaanut sianerumaartut.