Kikkut Oscarinnassanersut pissanngatigineqaqaaq

Takutitsinersuaq nunarsuaq tanmakkerlugu tv-kkut isiginnaartartunit hunnorujut millioninik arlalinnik amerlassusilinnit malinnaaffigineqassaaq.

Filmiliornermik ilitsersuisartoq Kathryn Bigelow, filmiliaminut sorsunnilersaarummut "The Hurt Locker"-imut, filmitut pitsaanerpaatut ilitsersuisuulluarnerpaatullu nersornaasigassatut piukkunneqarpoq. Ilitsersuisutut pitsaanerpaatut toqqarneqassaguni, nersornaasiisarnerup oqaluttuarisaanerani ukiuni 80-ini arnani siullerpaalluni ilitsersuisutut Oscarimik nersornaatisissaaq.

Bigelow siornatigut uigisaminit James Cameronimit unammillerneqarluassaaq, taannami filmiliani "Avatar" pillugu piukkunneqarpoq. Filmi taanna siunissamut takorluukkersaarutaavoq, maannalu Nuummi Katuami takutinneqarluni. Taassuma filmiliarinera 500 millionit dollarinik akeqarnerarneqarpoq. Filmip "The Hurt Locker"-ip filmiliarineqarnera taamaallaat 11 millionit dollarinik akeqartoq oqaatigineqarpoq.

Qallunaaq filmiliornermik ilitsersuisartoq Lone Scherfig, filmiliani tuluttooq "An Education" pillugu qallunaani filmiliornermik ilitsersuisartuni siullerpaalluni nersornaasigassatut innersuunneqartoq, Oscarinnattussatut ilimagineqanngilaq. Taamaattorli filmimi tassani inuttat ilaat arnaq, arnani filmiliaritittuni inuttaalluarnerpaatut innersuunneqarpoq. Aamma qallunaat Burma pillugu piviusumik filmiliaat nersornaasigassatut innersuunneqarpoq.

Isiginnaartitsisartoq Meryl Streep filmimi quiasaarummi "Julia & Julia"-mi arnani filmimi inuttaalluarnerpaatut Oscarinnattussatut ilimagineqarpoq. Aamma isiginnaartitsisartoq Jeff Bridges filmimi "Crazy Heart"-imi erinarsortartutut imerajuttutut inuttaanini pissutigalugu Oscarinnassangatinneqarpoq.

Unnuaru Oscarinnatsitsinerni pisimasut pingaarnerit, KNR-TV-kkut isiginnaartartut aqagu unnukkut tv-aviisip kingulliup kingorna takusinnaassavaat.