Kikkut ataatsimiigianngitsoortarnersut naluaat

Inatsisartut siulittaasuata ilanngullugu naqissuserpaa, Inatsisartunut qinigaasimaneq ukioq naallugu sulliviummat, Inatsisartut ataatsimiinnerisa nalaaniinnaanngitsoq pinnani.

- Inatsisartut ataatsimiititaliaanni peqataassanngikkaanni tamanna peqquteqartariaqarpoq, napparsimanermik imaluunniit Inatsisartuni ilaasortaanermut atatillugu allanik suliassaqalernermi, tamannalu pissusissamisoortutut isigineqartariaqarpoq. Kisianni uanga nammineerlunga nakkutiginngilakka ilaasortat sunik peqquteqarlutik ataatsimiigianngitsoortarneri tamanna ataatsimiititaliap namminneerluni nakkutigisassarimmagu, Inatsisartuni siulittaasoq, Josef Motzfeldt oqarpoq.

Inatsisartut ataatsimiititaliaanni ilaasortat tallimaasarput, Inatsisartuni partiinit ilaasortaatitanit ilaasortaaffigineqartunit. Ataatsimiititaliami ilaasortat pingasut najuukkaagata ataatsimiititaliaq aalajangiisitaasinnaassuseqartarpoq.

- Ataatsimiititaliami amerlanerussuteqartut, tassalu pingasut najuuppata, ataatsimiititaliaq aalajangersaasinnaavoq sunilluunnit. Tassani apeqqutaanngilaq kina kikkullu najuutinnginnersut. Inatsisartut ataatsimiititaliaanni ilaasortat tamatigut tallimaasarput.

Inatsisartut siulittaasuat, Josef Motzfeldt aperaarput pingasuinnaat najuunnerini aalajangiisinnaassuseqarneq piviusorsiortuunersoq, taannalu ima akivoq:

- Ilaasortat ataatsiakkaarlutik qinersisiminnut unneqqarissuunissartik namminneerlutik akisussaaffigaat. Aamma namminneq nalunngilaat qanoq akisussaaffeqarnerlutik, tassami ukioq kaajallallugu akissarsiaqarlutik sulipput, taamaattumik uanga Inatsisartut siulittaasoritigigaluarpanngaluunniit qanoq iliuuseqarnersut susassarinngilakka, namminneerlutik tamanna akisussaaffigimmassuk, Inatsisartut siulittaasuat, Josef Motzfeldt taama naggasiivoq.