Kikkummaa kalaallit unammivaat
Kultureqarnermut Naalakkersuisoq Mimi Karlsen Inuit Ataqatigiinneersoq kalaallinik timersortartunik qiimmassaaqataavoq Island Games ingerlanneqarmat. Tamanna nuannersunik misigisaqarfigisimavaa ilaatigulu arnat arsaattartut bronze-nnanniunnerat malinnaaffigalugu.
Mimi Karlsen tusagassiutinut nalunaarummini allappoq kalaallit arnartaat bronzennanniunnermi Jersey-mut ajugaasut. Kisianni tassa unammisaat tassaapput Western Isles qallunaatut De ydre Hebride-nik taaneqartartut.
Kikkut unamminerat inissivinngikkaluarlugu taamaattoq najuunnermini kalaallit timersortartut tamaviaarnerat qularutiginngilaa.
- Inuusuttorpassuit soqutiginnillutik timersuutiminnullu pikkorittut nalaappakka. Inuusuttut nunatsinneersut nuannaarlutillu peqqittut,angajoqqaaminnillu tapersersortillutik timersuutit neqeroorutigineqartut nuannaralugit ilaasut, peqatigiiffiup innuttaasullu kajumissutsiminnik ikiuuttut pilersitaannut ilaasut takullugit nuanneqaaq. Island Gamesip timersornermi inuit qanoq ataatsimoortigisinnaanerat, inuunerullu sinneranut ikinngutitaartortoqarsinnaaneranik pilersitsisinnaalerneq takutitsissutigilluarpaa,Mimi Karlsen oqarpoq.
