Kiista P. Isaksen: Misissuititsisoqalernera tusaaqqusaarneruvoq

Narsami allaffissornermi sulisut juullimut atatillugu ajunngitsorsitinneqarnerannik Hans Enoksenip misissuititsilernera oqinnersiuineruallaartoq, Narsaq kommuniusimasumi borgmesteri Kiista P. Isaksen isumaqarpoq.
januaarip 02-at 2009 13:30

- Hans Enoksenip qinikkat akissarsiaat taamarsuaq qaffariarlugit sulisartut erleruussinnaanngilai. Kommuninik kattussuussinermut atatillugu tunniusimallutik sulilluareersut kiinaannguusaartinneqassanngillat, Kiista P. Isaksen oqarpoq.

Taanna oqarpoq akileraarut peereerlugu allaffissornermi sulisoq ataaseq 2.000 koruunit sinnilaaginnarlugit pissarsisoq tamaattumillu anniaatigisariaqanngitsoq.

– Qinikkat akissarsiaat ukiortaamiit qaffanneqarput, allaallu kommunalbestyrelsini ilaasortaareersut aamma ikaarsaariarnermut ataatsimiititaliamut qinigaasut majimili qaleriinnik akissarsiaqartinneqarput, Kista P. Isaksen oqarpoq nangipporlu:

- Qinikkat qaleriiaanik akissarsiaqartinneqarmata arlaannaalluunniit oqaaseqanngilaq, taamaattumik allaffissornermi sulisut immikkut akilerneqalaarnerannik misissuititsineq ajornanngippallaaqaaq. Misissuisoqassappat Kujataata kommuniani tamarmi misissuisoqarniarli, Kista P. Isaksen oqarpoq.

Narsami allaffissornermi sulisunut ajunngitsorsiaritinneqartoq akileraarut peereerlugu 74.000 koruuninik naleqartoq, Kiista P. Isaksen aamma oqarpoq.