Kiisami sinneqartoorpoq
Nerisassanik imaaneersunik tunisassiorfiup qaammatini siullerni arfinilinni naatsorsuutaasa ersersippaat, 12 millionit koruunit sinneqartoorutigineqartut. Ukioq kingullermut sanilliullugu pitsanngoriaat 69 millionit koruuniuvoq, tassami siorna qaammmatini siullerni arfinilinni 57 millionit koruuningajannik amigartooruteqarami.
Suliffeqarfissuaq 2,5 miliardit koruuningajannik ukiumut kaaviaartitsivoq.
Royal Greenland naatsorsuutinut tunngatillugu nalunaaruteqarnermini allappoq, nioqquteqarfinni pingaaruteqarnerusuni suliffeqarfiup annertunerusumik tunisaqartalersimaneranik siuariarneq peqquteqartoq. Ingammik Frankrigimi, Kinami nunanilu avannarlerni siuariaateqarluarsimavoq.
Taamaattorli siuariaateqarneq kalaallit tunisassiaannit, raajanit uusunit qalipaajarneqarsimasunit qalipaajarneqanngitsunillu ooqangitsunit, pimmat naqissuserneqassaaq. Tamatuma saniatigut ukioq kingulleq Royal Greenlandip Cuxhavenimi tunisassiorfimmik pisinerata kingorna nipisat suaannik nioqqutissiornermit patajaatsumik iluanaaruteqarsimanermit pipput.
Aammattaaq Royal Greenlandip maluginiaqquaa, pitsaasumik ineriartorneq qalerallit raajallu pisiarinerini akiisa qaffariarnerannik unammillerneqarmat. Maanna akiusut ukioq kingullermut naleqqiullugit 20 procentimik qaffasinnerupput.
Ilutigitilluguli innaallagissamut, imermut assartuinermullu akigitinneqartut Royal Greenlandip nunanut unammillertigisaanut naleqqiullugit qaffasinnerujussuupput. Tamannali tunisassiornerup nutarterneqarneranik tunisassianullu piariikkanut atatillugu periuseqarnermik illuatungilerniarneqarpoq. Tamanna Ilulissani Sisimiunilu raajanik tunisassiorfiit kiisalu Qasigiannguani qaleralleriviup nutarterneqarnerannik kinguneqarpoq. Kalaallit Nunaanni tunisassianik annertunerusumik ineriartortortitsinissaq taamaalilluni nutarterinerit periarfissaqalersippaat.
Royal Greenlandip Tysklandimi Polenimilu tunisassiorfii annerusumik aamma kaaviiaartitsisimasut, naatsorsuutit pillugit nalunaarusiami takuneqarsinnaavoq.
Royal Greenlandip ukiap ingerlanerani, suliffeqarfissup akiitsuinut milliardilikkaanut 315 millionit koruuninik akiliiniartoq aamma ilanngullugu erseqqissarneqarpoq. Namminersorlutik Oqartussanit atukkat 50 millionit koruunit matumani ilanngullugit.
