Nanoqarpassuaqalerneratigut nannunniarneq illut eqqannguini pisalerpoq.Assi: Andreas Østergaard/KNR

Kiisa itsuannisaaginnarlutik nannunniartalerput

Tunumi piniartut ilaat ateruseqartinneqarput: Itsuannisaarlutik piniartut. Silap pissusiata allanngoriartorneratigut Issittup sikua nungukkiartulerpoq, nannullu illoqarfinnut qanillattortalermata ungasissumut qimussernissaq piariaaruppoq.

- Sikkorluppoq. Saappallaaqaaq. Qimusserfigineqarsinnaanngilaq. Qanga sikulluartarallarmat sinaavalu avasinnerusumiittarallarmat nuannerneroqisoq, piniartoq Isak Pike oqarpoq.

Isak Pike angerlarsimaffimmini inimit igalaakkut itsuannisaarpoq, Ittoqqortoormiit kangerluat isikkivigaa. Kangerluup ilarujussua sikuunngilaq, kilometererpassuillu nunakkut ingerlaaqqaarluni kujammut angalasoqarsinnaavoq.

- Ukiukkut ilaanni siallertalerpoq. Tamanna siornatigut qaqutigoortupilussuugaluarpoq. Eqqumiippoq, Isak Pike oqarpoq.

Isak piniartuujuaannarsimavoq. Ukiulli 30-t sinnerlugit matuma siorna qimusseqqaarmalli maannamut allanngortoqarsimaqaaq. Isak piniartoqatinilu siornatigut ungasissorsuarmut qimussertarput, ilaannilu illoqarfik qimallugu kilometerit 500-t angalallutik nannunniarlutillu umimmanniartaraluarput. Piniarnerli ullumikkut qinnguserluni kaffisorujoorutaa igalaakkut itsuannisaarluni pisarpoq.

 

Nanoq pisarineqaannassaaq

Nannut illoqarfinnut pisarneri akulikinnerulerput - nerisassarsiorunarlutik, sikup nungukkiartulernerata puisinniarnissaat ajornarnerulersippaa.

Pinngortitaleriffiup uuttortaaneri malillugit, Imaata sikua 90-ikkunniilli 10-15 procentinik millisimavoq. Ukiullu ilaa sikusarfik aamma sivikillisimavoq. 70-ikkut naalernerinut naleqqiutissagaanni, ukiumut piffissaq sikusarfiusoq qaammammik ataatsimik sivikinnerulerpoq, kingusinnerusukkut sikusalerluni siusinnerusukkullu aamma aattortalersarluni.

Nanorpassuaqarnera pissutigalugu pisassiissutaasut nungulertupallattarput. Nannulli nererusullutik illoqarfinnut pisarnerat piuarpoq, qimaatinneqartariaqartarlutillu. Qimaatitsiniarnerit pingajussaat iluatsinngippat, taava nanoq, imminut illersorniarnertut taallugu, aallaaneqartarpoq, neqaalu, amia niaqualu arsaarinnissutigineqartarlutik. Nanorli makitaasarpat ingerlaannaq aallaaneqarsinnaavoq.

Aamma atuaruk Nannut amii tuniniaruminaatsut

Takornariat tyskit marluk piniartullu angallassisut marsimi illoqarfimmit ungasiartumi illuaqqamukarmata taamatut pisoqarpoq. Nannup nererusulluni qimmeq upappaa. Nanoq aallaaneqarpoq takornariallu ajoquseratik tuparujussuaannarput qimmerlu ajoquserpianngilaq.

Isak Pikep illumi nannunit qanillineqartarnera ataasiarani misigisimavaa. Taamaammat piniarneq ungasissorsuarmukaqqaarani inimit maanna pisalerpoq.

- Angerlarsimaannarluta igalaakkut qinngusersaarluta nannunik qamasarpugut. Maanngaanniit kilometerinik marlunnik-pingasunik ungasitsigisumi ingerlaartarput. Nanorpassuit maanga qanillisarput. Amerlangaarmata kisissinnaanngilakkaluunniit. Nikilaaraangata paasisarparput nanoq qaninngoortoq! Taava piniartut allat sianerfigisarpakka. Taava paasissavaat uanga taanna pissarigiga. Uangami takoqqaarpara, taama oqaluttuarpoq.

 

Piniartutut inuussutissarsiuteqarneq iluanaarnarunnaarsimavoq
Piniarneq ajornannginneruleraluartoq piniartullu nannunik amerlanerusunik takusaleraluartut, imaanngilaq inuussutissarsiutitoqaq iluanaarfiulluartoq. Taamaaqqajanngilaq.

Kalaallit Nunaannimi nannunniarneq pisassiissuteqartarnikkut killilersugaavoq, nunani tamalaani isumaqatigiissuteqartoqarneratigut ammit nalitoorsuit nunanut allanut piniartut tuniniaqqusaanngilaat. Tamanna silap pissusiata allanngoriartornerata nannup uumasutut mianerisassatut isigineqarneranik, aammalu Tunumi nanoqassutsip ilisimaneqanngineranik peqquteqarpoq.

Isak Pikep nannuttani kingulleq matumi isaariaanit aallaavaa. Sissap qulinnguani illoqarpoq, kangerluk sikuusoq qaqqarsuarnit ungaluneqarsimasoq isikkivigalugu.

- Nanoq qimmit saannguanniittoq igalaakkut takuara. Orsutortoq. Takugaminga soqutiginanga neriinnarpoq. Pikivunga, aallaallu tigusinnarlugu, qaammartartoq angineq nassarlugu anivunga. Eqqarsaannarpunga: Aallaassavara. Qungasiatigut aallaariaraluarakku allatigut aallaavara. Taava ungasillivoq orlullunilu, taava tunusuatigut aallaavara. Toquvoq. Neqissaqartariaqarpugut. Toquttariaqarpara, taamatut eqqarsaannarpunga.

Isak piniartoqataalu allat illoqarfimmioqataasa quiasaarutigalugu itsuannisaarlutik piniartunik taagorneqarput.

- Hehe, ajorpoq, Isak illarluni oqarpoq.

Aamma atuaruk Illoqqortoormiuni nannunniarneq

Piniartut silap pissusiata allanngoriartorneranik ilungersuuteqarnerat piniarnermullu malittarisassat radiokkut aallakaatitassiami 'Løb isbjørn'-imi annertunerusumik paasisaqarfigineqarsinnaapput. Aallakaatitassiaq danskisoortoq unnugu marlunngornermi nal. 20.10 KNR Radiokkut tusarnaarneqarsinnaavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat