Kiinnat nutaat ilisarnartullu qinigassanngortipput
Qineqqusaartut akornanni tupaallannarnerpaavoq Nuummeersoq 31-nik ukiulik Aviaaja Karlshøj Poulsen. Ilinniarnermi nalaani politikkikkut suliaqartarsimavoq, kisianni imminut taaneratut "nunatsinni politikkikkut nutaarluinnaavoq".
- Oqarsinnaavunga nunatsinni politikkikkut sulinermi nutaarluinnaallunga, saqqummiigamali oqaatigaara ilinniarnerma nalaani politikkikkut suliaqartarsimallunga soqutigisorujussuusannik, Aviaaja Karlshøj Poulsen oqarpoq.
Aviaaja Karlshøj Poulsen Maniitsumi inunngorpoq, arkitektitullu ilinniarsimasuulluni. Saqqummiinerminilu ilanngullugu taavaa ilinniarneq suliassaami pingaarnersaasa ilagissagaat.
Qinigassanngiortittut sinneri pingasut politikkimik suliaqarnermik misilittagaqarput. Michael Rosingilu Ilulissani Danmarkimilu peroriartorsimasoq Inatsisartuni takuneqartareerpoq Astrid Fleischer Reximut paarlattaalluni sulisarnermini. Qineqqusaarnermi nunatta oqaluttuassartaa saqqummiukkusuppaa, oqarluni "qallunaat paasineq ajoramitigut":
- Maannakkorpiaq soqutigilluinnagaraara aningaasaqarneq pillugu eqqarsarneq. Kisianni aningaasaniit pinngortitamiillu suliarerusunneruara nunatta inuisa tarningisa ataavartinnissaat, Michael Rosing oqarpoq.
Qineqqusaartussallu kingulliit marluk politikkikkut ilisimaneqareerpoq, tassaasut Inatsisartuni ilaasortaq Niels Thomsen aamma Qaasuitsup kommuniani kommunalbestyrelsemi ilaasortaq Ane Lone Bagger. Ane Lone Bagger sillimmasiisarfimmi Trygemi sulisuuvoq qinerneqassagaluarunilu suliassaqarfiit amerlanerusut nunatsinniit aqunneqalernissaat anguniagassatut siunniussimavai.
Saqqummiinermi inunnut takkussimasunut 15-it missaanniittunut Demokraatit qinersisoqarnissaanut allanik partiinik suleqateqassanatik taavaat, soorluttaaq kina statsministeritut taajumaarnerlugu oqaatigiumanagu, Lars løkke Rasmussen talerperliuniallu ilimanarnerugaluartut:
- Suleriuseq unaasariaqarpoq Kalaallit Nunaanni folketingimut ilaasortassamik nunatta soqutigisai sukkulluunnit eqaattumik anguniarneqarsinnaassasut, uagut tassa taanna kissaatigisarput. Uagut massakkut qineqqusaarnerup iluani taasinianngilagut folketingimi aappaluttukkormiut siuttuat imaluunniit talerperliunerit siuttuat taassallugu. Uagut qinersineq naammassippat takorusupparput, qanoq Danmarkimi allanilu qinersinerit taakku inissippat taava tassuunakkut uagut pissaaneq anginerpaaq Kalaallit Nunaanut iluaqutaasussaq qanoq angusinnaavarput, Niels Thomsen oqarpoq, qineqqusaartut allat pingasut ilagalugit ullumi Demokraatit siulittaasuannit Jens Blidorf Frederiksenimiit plakatit qineqqusaarutit saavanni saqqummiunneqarnerminni.
