Kiinamiorpassuit Sisimiuni takornariartut
Umiarsuaq takornariartaat, Ocean Diamond tikimmat kiinamiut aatsaat taama amerlatigisut nunatsinnut ataatsikkut tikipput. Albatros Expeditionsimi ingerlatsisoq, Malik Milfeldt taama paasissutissiivoq.
Takornariat tikinneranut atatillugu Qeqqata Kommuniata borgmesteria, Malik Berthelsen tikilluaqqusivoq, kiinamiunillu ersaattaanneqarluarlunilu assilisittaqattaarpoq.
- Immitsinnut attaveqaatigut pitsaanerulissapput, immitsinut tikeraakulaarnerugutta. Taamattumik Sisimiut Nunarpullu tikeraarnissaa toqqarsimagassiuk qujanarujussuaq.Tamanna Kinamut Nunatsinnullu pingaaruteqarpoq, borgmesterip oqalugiarnermini oqarpoq, tamannalu ilutigalugu kineserinut eqqaasissutigalugu, arsarnernik qimussernermillu takornariarnermik ukiuunerani ornittakkatut nunap immikkoortua pitsaasuusoq.
Albatros Expeditions kiinamiunut takornarianut nunatta sineriaani ukiut arlallit angallassisarpoq.
Ocean Diamondip ulluni arfineq pingasuni angalanermini Qeqertarsuaq, Uummannaq, Niaqornat Ilulissallu aqqusaassavai kingornalu Kangerlussuarmut uteqqissalluni.