Kiinaaleeraq toqunartoqaqisoq

Nunatsinni kiinaaleeqqat mingummik toqunartumik pcb-nik ddt-nillu akoqangaatsiartut, Danmarkimi avatangiisinik missuisartut, DMU-meersut naliliipput.

Toqunartup kiinaaleeqqat timaanniittup annertussuserisartagaa ukiuni kingullerni 17-ini allannguuteqangaarsimanngilaq, manniilli qaleruaat nalinginnaasumit saannerupput, naak aserujanngikkaluarlutik.

Kiinaaleeraq timmiaqatiminik, soorlu naajanik nerisarmat mingutsitsinermit sunnertiasuuvoq, Nunatsinnilu kiinaaleeraq amerikamut qiterlermut aallartarmat toqunartumik akoqalersimasarnera arnavissat manniisigut takuneqarsinnaasarpoq.

- Misissuinerit inerneri annertunerusumik nutaartaqanngikkaluarput, toqunartulli ilaat Europami inerteqqutaalersimagaluit USA-mi suli atugaapput. DMU-meersoq Peter Borgen Sørensen nutaarsiassaqartitsivimmut Ritzau-mut oqarpoq.

Kiinaaleeraq nunarsuarmi uumasunit tamanit sukkanersaagunarpoq, sukkanerpaagaangami nalunaaquttap akunneranut 300 kilometerit angusarmagit.