KIIIP-imi pisortanngoqqittoq apeqquserneqarpoq

marsip 23-at 2006 16:50

KIIIP-imi pisortanngoqqittoq Lise Lennert Olsen, taassumalu atorfinitsinneqarsimanera, demokratineersumit Jens B Frederiksen-imit apeqquserneqarpoq.

- Apriilip aallaqqaataani Lise Lennert Olsen-ip aappassaanik KIIIP-imi atorfinitsinneqaqqinnera assigiinngitsunik apeqquserpara, taama Demokraatineersoq Jens B Frederiksen allappoq.

Jens B Frederiksen-ip apeqqusiineranut ilaatigut makkua apeqqutigineqarput: KIIIP-imi pisortassatut qinnuteqartut qassiusimappat? Qassillu atorfinititsiniarnermi oqaloqatigineqarsimappat? Aammalu atorfinititsiniarnermi naliliissussat kikkuusimappat?

Kultureqarnermut Ilinniartitaanermut Ilageeqarnermut Ilisimatusarnermullu Naalakkersuisoq Doris Jakobsen oqarpoq, atorfinitsitsineq Naalakkersuisut siulittaasoqarfiannit nalilerneqarsimasoq, tassanilu atorfinitsitsiniarnermi naliliisartut tamarmik isumaqatigiillutik aalajangersimagaat Lise Lennert Olsen atorfinitsinneqassasoq.