KIIIP: Efterskolertussat pisortaqarfiup piareersimaffigai

Atuaqatigiiaat arlariit atuarunnaarnissaat Naalakkersuisut piareersimaffigalugu tusagassiuutinut nalunaarput. Taamaalillutik Meeqqat atuarfiini siunnersortit isumasioqatigeeqqammersut, Namminersornerullutik Oqartussat pinialuusaarnerannik uparuaanerat akineqarpoq.

Atuartunut annernut siunnersortit isornartorsiuinerat naapertuutinngilaq, Ilinniartitaanermut Pisortaqarfimmit KIIIP-imut allapput.

-2008-mut piareersaateqarpugut, Naalakkersuisut Ilinniartitaanermut Naalakkersuisoq 2007-imi maajimi pisinnaatippaat Knud Rasmussenip Højskoliani aamma Sulisartut Højskolianni siulersuisunik isumaqatigiissuteqarniarnissamut, paasiumallugu 2008/2009-mi højskolini pineqartuni efterskolertitsisoqarsinnaanersoq. Paasinarsivoq Knud Rasmussenip Højskoliani efterskolertitsinissaq kissaatigineqanngitsoq. Qujanartumilli Sulisartut Højskoliat nalunaaruteqarpoq 2008/09-mi efterskolertitsinissaq piviusunngortikkumallugu, nangipput.

Piareersaatit maanna inaarsarneqarput, erseqqissumillu nalunaarutigineqarsinnaanngorneqarpoq Nunatsinni efterskolernissaq aappaagumiit periarfissaalissasoq, aappaagulu ukiorlu atuarfiusoq 2008/09-mi Sulisartut Højskolianni ingerlanneqassasoq.

Aamma siunnerfigineqarpoq ukioq atuarfiusoq 2009/10-miit Qasigiannguani Villads Villadsenip Efterskolia aallartissasoq.

Efterskolerniarluni qinnuteqarnermi periusissat ulluni makkunani Sisimiuni ilinniartitsisut siunnersortit peqataaffigisaannik suliarineqalereerput, pisariaqartitsinerlu naapertorlugu ilitsersuutinik malitseqartinneqassallutik.

Efterskolernermut tapiissutinut angajoqqaallu akiliuteqartarnerinut tunngasut maannamut Danmarkimi efterskolertoqartarneranut atatillugu malittarisassaasut maliinnassagaat, KIIIP-imiit aamma erseqqissaatigineqarpoq.

Pisortaqarfimmit ilisimatitsissutigineqarpoq, siunnersortit ulluni tulliuttuni paasissutissanik tunineqarumaartut.