KIIIN-imi paasissutissanik isertukkat misissorneqarsinnaalerunarput
Atassummili maannakkut misissuisitsinissap akuersaarneqarnissaa aalajangiunneqartoq, Augusta Salling oqarpoq. Qasigiannguani efterskolimut tapiissutit pillugit inatsisilerituunik arlaannaannulluunniit attuumassuteqanngitsunik naliliisoqarnissaa Inatsisartunit oqallisigineqaqqinnissaa, Inuit Ataqatigiit siunnersuutigimmassuk, Inatsisartut Siulittaasoqarfianni Atassummeersup itigartitsineratigut qaqinneqaqqinngitsooraluartoq, maanna Atassutip akuersaarneratigut eqqartorneqaqqissinnaalissagunarpoq. Inatsisartuni oqaluuserisassanik siunnersuuteqarnissamut piffissaliunneqarsimasut Siulittaasoqarfimmi ilaasortatut saneqqutaarniannginnakkit, Siulittaasoqarfimmi naaggaaqqaaraluarpunga. Atassumili oqallisigigeerlutigu aalajangerpugut Siulitaasoqarfimmi ullumi ataatsimiinitsini akuersaarlunga taasisinnaasunga. Taamaalilluni Siulittaasoqarfimmi isumaqatigiissagutta oqallisissaq qaqinneqaqqissinnaassaaq. Siunnersuuteqartoq saqqummiusseqqippat, siullermillu isumaqataasut isumaqataaginnassapata misissuisitsinissaq akuerineqarsinnaalissaaq. Qasigiannguani efterskolimut tapiissutinut atatillugu Ilinniartitaanermut Naalakkersuisoqarfiup paasissutissanik isertuussisimanera naatsorsuuserisunit sakkortuumik isornartorsiorneqarpoq. Inatsisartunilu siullermik oqaluuserineqarnerani misissueqqusisut isummaminnik attassiinnarpata, Atassummeersut tamakkerlutik isumaqataassappata misissuisitsisoqarsinnaalissaaq.
Aningaasaqarnermut ataatsimiititaliaq sinnerlugu saqqummiussininni oqaatigereerpara misissuisitsinissaq pissusissamisuussasoq, Augusta Salling oqarpoq.