Kii mii tikkum!

Sorsunnersuup kingulliup nalaani 1940-miit 1945-mut meeqqat taamatut tuluttut oqalunneq ilikkapallappaat.

Silamiut pisortaata, Svenn Syrinip isiginnaartut nunatsinni 40-kkunni pisartunut utersaartissavai, taamanimi nunarput tyskinit Danmarkimut attaveerutsinneqarpoq, USA-lu arlalinnik sakkutooqarfiliorluni.

Taamaalilluni Amerikamiut sakkutoorpassui tikerarput, isiginnaagassiamilu ”Kii mii tikkum”-imi kalaallip arnap inuusuttup Amerikamiullu sakkutuuisa ilaata asaqatigiinnerat oqaluttuarineqarpoq.

Amerikamiut takkunnerisigut nipilersukkat nuannersut aamma takkupput, soorlu blues aamma jazz, isiginnaagassiarlu nipilersukkanik nuannersunik taamanernisanik ilaqaqaaq.

Tamatumunnga atatillugu erinnat taallallu kalaallisuut taamanikkornisat Silamiunit pissarsiarerusunneqarput.

- Nalunngilarput taamaattunik erinarsuuteqartoq, kisianni sumiinnersut naluarput, Svenn Syrin Radioaviisimut oqarpoq.

- Aasianni timmisartoq nakkartoq pillugu erinarsuuteqarporooq aamma Amerikamiut erinarsuutaat ”Red River Valley” kalaallisut taallartaqarporooq – soorlu tamakkua suli eqqaamaneqarpata pissarsiarerusukkaluarpavut, Svenn Syrin oqarpoq.

Isiginnaagassiami inuusuttut marluk pingaarnertut inuttaasut tassaapput Alexander Montgomery-Andersen aamma Ajaaja Gabrielsen, kingulleq erinarsortartuuvoq inuusuttoq, Pele Møllerip nipilersortartui peqatigalugit CD-mik saqqummersitseqataaqqammersoq.