Kigutit nakorsaat aalajangersimasumik atorfinikkumanngillat
Peqqissaaveqarfinnik Aqutsiviup ukiorpassuarni sulissutigisimagaluarpaa, kigutit nakorsaannik amerlasuunik nunatsinni aalajangersimasumik atorfeqartoqalernissaq, kisianni ulloq manna tikillugu kigutit nakorsaat aalajangersimasumik atorfinikkumanngillat.
Peqqissaaveqarfiup Aqutsiviata ataani kigutilerisuuneq Frank Senderovitz eqqoriaavoq, nunatsinni atorfinitsitseriaaseq immaqa akornutaaqataasoq.
- Tamanna ajornartorsiut assigiimmik paasineqarsinnaasumik nassuiaatissaqartissasuugukku, imminut kakkagissagaluarpunga, Frank Senderovitz aallartippoq nangillunilu.
Kisianni arlallit tikkuarneqarsimapput, tassa ilaatigut ullumikkut pissusiulersimasoq siornatigornit allaanerusoq tikkuarneqartut ilagaat, tassalu kigutit nakorsaasa akornanni aaliangersimavissumik atorfinitsitaarusunnginnerat pissusiulersimasoq. Assersuutigalugu Kalaallit Nunaani atorfinikkusukkaanni ukiuni pingasuni isumaqatigiissusiorluni sulisariaqarnermik imalik. Tamanna amerlasuut ingasagaat. Qujanassagaluaqaaq periaaseq taanna peerneqartuuppat, Frank Senderovitz nassuiaavoq.
Kalaallit Nunaani kigutit nakorsaanik amigaateqartoqaraluartoq, taamaattoq Frank Senderovitzip qularinnginnerarpaa innuttaasut ullumikkumut sanilliullutik kigutiginnerulersinnaasut.
1970–ikkunni 80–ikkunnilu periaasiusimasut kinguneqarluarsimasut tunngaviusinnaaneri upperinerarpai. Taamanikkut kigutit nakorsaat najuullutik sulisunik iliniartitsinerat ingerlanneqartarpoq, kisiannili ullumikkut periaaseq tamanna atorneqarsinnaanngilaq kigutit nakorsassaqannginnatta. Taava allatut ajornartumik nutaaliorluta najoqqutassiortariaqarpugut.
- Maannakkut Peqqissaasut Ilinniarfiat oqaloqatigalugu aallartipparput naak kigutit nakorsaannik amigaateqaraluarluta sulisut ilinniarsinnaalernissaannik pilersaarusiorluta, Frank Senderovitz oqarpoq.
Frank Sendorovitz Peqqissaaveqarfiup Aqutsiaviani kigutilerisuunerup aamma erseqqissarpaa, kigutit nakorsaannik aalajaatsunik atorfinitsitsinissat ilungersorlutik sulissutigiuartariaqaritsik aammalu kigutsigissuunissamik angusaqarniarnermi sulisoqarnikkut ilinniartitsineq ataavartoq pilersinniartariaqaritsik.
