Kigutileritinnissamut annilaangasut meqquteeqqat ikiorpaat

Inuit kigutileririffimmukarnissaminnut kigutileritinnissaminnullu annilaangasartut akupunkturerlugit, tassa meqqutinik kappussuiffigalugit, ikiorneqarsinnaapput.
apriilip 07-at 2010 06:30

Tuluit Nunaanni misissuinerup nutaap tamanna ersersippaa, tassa inuit 20-t, kigutileritinnissaminnut assorsuaq annilaangasartut, akupunkturertinnermik kingorna kigutilerisumukarsinnaanngorsimapput, eqqissivillutillu issiavimmut ingillutik kigutileritissinnaanngorlutik, kigutilerisoq tatigingaarlugu.

Kigutilerivimmi issiavimmut ingitsinnagit minutsit tallimat sioqqullugit sivikitsukullammik akupunkturerneqarsimapput.

Taakku kasserisigut meqqutinik marlunnik ikkussivigineqarput, tassa akupunkturiisartut inuit eqqissisarniarlugit kassermi sukkut ikkussinissartik nalunngilluartarpaat, siunertarlumi uani misiliinermi iluatsilluarpoq.

Kigutileritittut uku taamaallaat ilisimajunnaarsinneqaqqaarlutik, imaluunniit eqqissisaatitoqqaarlutik, aatsaat kigutileritikkusussagaluarput.

Inuit 20-t ilisimatuussutsikkut misiliinermut ikippallaartut, akupunkturertinnerlu ilumut annilaangajunnaarsitsisarnersoq, ilisimatuut, misiliinissamik aallarniisut, nassuerutigaat - neriulluarnartorligooq BBC Newsimi allaaserineqarpoq.

- Naak inuit ikittunnguit misiliiffigigaluarlugit, tamarmik iluaqutigaat, kigutilerisoq akupunkturiinermik misiliinissamik isumassarsisoq, Palle Rosted, erseqqissaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq