Kigutilerisut peqatigiiffiata misissuititsiniarnerat taperserneqarpoq

HK-p Danmarkimilu kigutilerisut peqatigiiffiata, Dansk Tandlægeforeningip, kigutilerisut ikiortaasa kviksølvimik suliaqartarnerminni peqqiilliulersimanissaannik misissuinissaq suliffeqartitsinermut ministerimit, Claus Hjort Frederiksenimit, piumasarineqartoq tapersersorpaat.

Kigutilerisut ikiortaat kigutit ilaassaannik kviksølvitalinnik suliaqartarnerminni peqqiilliulersimasoralutik HK/Privatimut annilaangallutik saaffiginnittarput maannamullu 1475-t saaffiginnissuteqareersimapput.

Danmarkimi nunatsinnilu kigutilerisut ikiortaat 10.000-t missaanniittut 1960-kkunniit 1980-kkut qiteqqunnerata tungaanut kigutit ilaassaannik kviksølvimik assamminnik akoorisarsimanermik kigunerisaanik akuutissat toqunartortallit illersuuteqaratik aalaannik iijoraasarsimasut saaffiginnissuteqarnerisa kingunerisaanik kiisalu Sullivinnik Nakkutilliisoqarfiup malittarisassai aamma malinneqartarsimanngimmata misissuineq aallartinneqarpoq.

Nappaatit arlaqartut ilisarnaataat tunngavigalugit misissuineq peqqissaarunneqarpoq:

* Ilisimatuut nunat avannarlerneersut ataatsimoorlutik misissuinerit qnaoq ingerlanneqassanersut ataatsimiissapput.

* Arlaannaanulluunniit atanngitsut ilisimannittuliullugit allaaserisanik misissuisoqassaaq.

* Kigutilerisut ikiortaasa qanoq akulikitsigisumik napparsimasarsimaneri misissuiffigineqassaaq.

* Kigutilerisut ikiortai immikkut toqqakkat 1985 sioqqullugu sulisimasut peqqissusaannik misissuisoqassaaq.

* Ataatsimoorussamik isumaqatigiissuteqarluni misissuinermi maleruagassiortoqassaaq.

Norgemi Sverigemilu kviksølvimik peqquteqartumik peqqiilliortoqartarsimanera aamma maluginiarneqarsimammat nunat taakku suleqatiserineqarsimapput.

Danmarkimi kigutilerisut ikiortaat immikkut toqqarneqarsimasut maannangaaq misissorneqalereerput. Ukiullu marluk qaangiuppata misissuineq naammassissangatinneqarpoq.