Kigutilerineq nutaamik aaqqissuunneqaqqusaavoq

Inuk peqqissutut misigissaguni, taava kigutigissuunissani nammineq isumagisariaqarpaa. Taamaattumik nunatsinni peqqinnissamut tunngavissami inuiaqatigiit kalaallit kigutigissuunissaat qitiulluinnartunut ilaavoq, Danmarkimi kigutilerisunngorniarfimmi professori, nunatsinnilu meeqqat inuusuttullu kigutigissusaanik misissuisitsisimasoq, Poul Erik Petersen oqarpoq:

- Peqqinnissamut tunngavissami pingaaruteqarpoq kigutinik isumaginninnerup qitiutinneqarnissaa, Poul Erik Petersen oqarpoq, nangillunilu:

- Nunatsinni peqqinnissamut tunngavissami eqqarsaatersuutigineqartut pitsaasuugaluarput, pingaaruteqarporli pilersaarutit piviusunngortinneqarnissaat. Siunissaq ungasinnerusoq isigalugu pitsaanerussaaq pinaveersaartitsineq qaarmarsaanerillu qitiutinneqarpata, katsorsaanermut asuli aningaasanik atuipiluttoqarani, Poul Erik Petersen oqarpoq.

Taanna aamma isumaqarpoq inuiaqatigiit kalaallit kigutiminnik pingaartitsinngippaallaartut, maannangaarlu iliuuseqartariaqartut.

Poul Erik Petersen kigutigissaasut atuagassiaanni, Tandlægebladetmi, nalunaarusiamik juunimi saqqummersitsissamaarpoq.

Nalunaarusiami taaneqartumi atuarneqarsinnaavoq kalaaliaqqat arfinilinnik ukiullit tallimaagaangata, sisamat kigutaat putoqartartut. Nunani avannarlerni allani kisitsisit allarluinnaapput. Meeqqat taamatut ukiullit akornanni kigutiminni putullit ikinnerusarput, Poul Erik Petersenilu isumaqarpoq meeqqat nunatsinniittut mamakujuttutorpallaartut.

Danmarkip kigutilerisunngorniarfiani professorip Poul Erik Petersenip misissuisitsinermini ersersippaa nunaqarfinni avinngarusimanerusuni kigulluttut amerlanerusartut.