Kigutigissuuunissamik suliniut apeqquserpaat
Inatsisartunut ilaasortaq Demokraatineersoq Palle Christiansen, kigutilerisutut ilinniarsimasuusoq, pisortat kigutitigut peqqissuutitsinissaq, kiisalu aappaagumiit 2012-imut kigutiginnerulernissaq, siunertaralugu anguniagassatut nutaatut sukumiisutullu siunniussat pillugit arlalinnik naalakkersuisunut apeqquteqaateqarpoq.
Palle Christiansenip paaserusuppaa anguniakkat taama annertutigisut piviusunngortinneqassappata atorfiit inuttalerneqarnissaat naalakkersuisut qanoq takorloorneraat.
Aamma – Palle Christiansenip ilanngullugu apeqqutigaa: Meeqqat qulingiluanik ukiullit 80 procentiisa 2012-imi kigutaasa putuerunnissaannik anguniagaqarluni siunniussaqarnerup anguneqarnissaa Naalakkersuisut piviusorsiortutut isigineraat?
Kiisalu Palle Christiansenip paaserusuppaa, anguniakkatut siunniussat taama annertutigisut anguneqassappata tamanna pisortanit qanoq annertutigisumik aningaasartuutigineqassanersoq.