Kigutigissuunissaq anguniarlugu suliniartoqalerpoq

Nunatsinni meeqqat kigutaasa putusannginnissaat anguniarlugu maanna suliniartoqalerpoq.

Sulineq pillugu kigutigissaasut siunnersortaat, Ane Jeppesen, ima nassuiaavoq

- Tassa suliniarneq maanna aallartippoq, meeqqat peqqissuunissaat kigutaasalu peqqissuunissaat angajoqqaat akisussaaffigingamikku, taava uani suliniutitsinni nutaami, imatut suliniarpugut, meeraq mikineraninngaanniit, qaammatinik arfineq pingasunik utoqqaassuseqarneraniit, angajoqqaavi ilaatillugit oqaloqatigalugit, siunnersorlugit malinnaaffigalugillu sulisalissalluta, Ane Jeppesen oqarpoq.

Suleriaatsimi nutaami anguniarneqarpoq, angajoqqaat meeqqami kigutaasa qanoq paarinissaannut paasisitsillunilu ilinniartitsinissaq.

-Siornatigut atuarfinni meeqqat klassikkaarlugit misissortarlugit atuartittarlugillu kigutilerisarnikuuvugut, massakkut allaanerusumik ingerlassaaq, meeraq angajoqqaavi ilagitillugit misissorneqartassammat, angajoqqaavi kigutaannik qanoq paarsinissaannik ilinniartiutigalugit kigutilerisalissagatta, Ane Jeppesen oqarpoq.

Kigutini putut pinaveersaartinniarlugit suliniarneq ullumiminngaanniit aallartinneqassaaq, ukiullu naanerani sineriammi tamarmi sulineq ingerlalluarneqalissasoq naatsorsuutigineqarpoq.

- Meeqqap kigutaa puttunniariarpat angajoqqaavisa akisussaaffigaat, taanna kigut puttuttoq putunnginnissaa isumagissallugu, kigutit puttukkaangamik peqqissuusarput putoqaratillu, kisianni kugitit puttunniariaraangamik qanitta bakteriaanik pinngitsoorsinnaanngisatsinnik katersuuffigineqalertarput, kigutillu salittanngikkaanni qalippertarput aserortarlutillu, Ane Jeppesen oqarpoq.

Nunatsinni meeqqat atuartut peqqissusaannik misissuinerit kingulliit ersersippaat, meeqqat quliugaangata arfineq pingasut ullut tamaasa kigutigissartartut.