Kigutigissarneq soqutigineqanngitsoq
Meeqqaniit inersimasunut nunatsinni kigutilunnerujussuaq suli takussutissaqarpoq, tungusunnitsunik imerneq nerinerlu, akuttuallaartumillu kigutigissartarneq kigutilussaataasoq, kigutit nakorsaata nalilerpaa.
Københavnimi kigutit nakorsanngorniarfiata aamma nunatsinni peqqinnissaqarfiup nutaamik misissueqatigiinneranni paasinarsivoq, nunatsinni innuttaasut suli kigutiminnik paarsinerloqisut. Agguaqatigiissillugu kigutilunneq Danskinut sanilliullugu nunatsinni suli kigutiluttoqaqaaq.
Sukkunik akulinnik akulikinnerusumik nerisaqarneq imigaqartarnerlu, akuttunerusumillu kigutigissartarneq kigutilunnerulernermut pissutaanerusoq Qeqertarsuarmi kigutit nakorsaat, ukiullu 15-nit sinerissami kigutit nakorsaasarsimasoq Britta Broberg oqarpoq sodavandeqalermalli angallanneqarsinnaasunik kigutilulerneq malunnarsivoq.
Britta Broberg aamma oqarpoq, nunaqarfinni illoqarfinnilu mikinerusuni inersimasut kigutilunnerupput, illoqarfinnili anginerusuni pissutsit allaanerummata.
Britta Brobergip assersuutigaa Qeqertarsuarmi inersimasut 40-niit 60-nut ukiullit quliugaangata pingasut kigutaat tamaasa pereersimasarput.
Nunatsinni misissuinermi meeqqat inuusuttuaqqallu aamma suli kigutiluppallaarput, aamma taakku kigutigissakulannginnermik pissuteqartumik Danmarkimut naleqqiullugu kigutilunnerupput. Isorliunerusuni illoqarfinnilu mikinerni kigutit nakorsassaaleqisarneq aamma kigutilunnermut peqqutaasut ilagaat.
