"Kigutigissaavitsialak" atorneqalerpoq

Suliassanut tamanut aalajangersimasunik periuseqalernikkut kigutileriffiit, sulisut taarseraakkaluarpataluunniit, pitsaassutsimik assigiimmik naammassinninnissaat qularnaarneqassasoq, Peqqissutsimut naalakkersuisoqarfik tusagasiuutinut nalunaarummi allappoq.

Periutsit atorneqalersut qitiusumit suliaapput, malittarisassanik najoqqutassanillu pingaarnernik imallit, aammali najukkani suliaasunik periusissiaqarpoq, najukkani pissutsinik suleriaatsinillu allaaserinniffiusunik.

- Pitsaassusileeriaatsimik paasinartumik atulersikkuminartumillu atuilernissaq toqqarparput. Kigutileriffinni sulisunit akuersaarluarneqarpoq, taakkulu tamarmik pitsaassusileeriaatsip ”Kigutigissaavitsialaap” suliamik pitsaassusiannut sunniutaanik pitsaasunik oqaluttuartalereerput, kigutit nakorsaasa pisortaat Frank Senderovitz oqarpoq.

Peqqissutsimut naalakkersuisup Agathe Fontain-ip qularinngilaa kigutilerisut pitsaassutsimik anguniagaqarlutik sulinerat peqqinnissaqarfiup sinneranut isumassarsiutaalluarumaartoq.

- Kigutilerisut pitsaassusileeriaatsimik ”Kigutigissaavitsialak”-mik atuilersimanerat naammagisimaartorujussuuara, Agathe Fontain oqarpoq.