Kigutigissaatitit saqqummikkit

Ullumikkut kigutigissarnerup ullorigaluaraa taamaattoq Nunatsinni kigutilerisoqarniarnera suli ajornartorsiutaaqaaq.
Allattoq Jørgen Semionsen
maajip 21-at 2010 05:41

Paamiuni Narsami Qaqortumilu kigutilerisoqangikkallarpoq. Illoqarfinni taakkunani kiguserisut pisariaqartitsivillutik kigutilerisumukassagunik nammineq akilerlugu illoqarfimmut allamut suliaritikkiartortariaqarput.

Nunatsinni illoqarfiit arfinillit kisimik aalajangersimasunik kigutilerisoqarput, illoqarfiit sinnerini taartaagallartut kisimik isumalluutaallutik.

Paamiormiut arlallit nammineq akilerlugu Nuummut kigutilerisumukartariaqartarput.

Narsami Qaqortumilu pissutsit allaanerussuteqanngillat.

- Kigutilerisoq 2006-imi Qaqortumiit aallarpoq, tamatuma kingorna kigutilerisut piffissami sivikitsumi taartaagallartartut kisimik isumalluutaasarput, kigutigissaasoq, Pauline Egede oqarpoq.

Qaqortumi kigutilerisoq taartaagallartussaq sisamanngorpamiit sulilertussaavoq, julillu 14-iani kigutilerisumit allamit aamma taartaagallartumit taarserneqassalluni.

Qaqortumi pisariaqartitsivillutik kigutilerisumit suliarineqartariallit sisamanngornerup tungaanut utaqqisariaqassapput.

- Ajuusaarnaraluaqaaq pissutsilli taamak ipput, Pauline Egede oqarpoq.

Taanna immikkut akuerineqarluni arlaleriarluni kigutaarsisariaqarsimavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq