Kigutigissaasoq: Akisussaaffik annerpaaq angajoqqaaniippoq
- Ukiut 37-it tungaanut ingerlaneranni nunaqarfinnut angalasarnitsinni annertuumik kigutaarsinnerujussuit aamma kigutit nakorsaata putorpassuit suliai suleqataaffigisarsimavakka, Emilia Jensen oqarpoq.
Angajoqqaat ilaat meeqqamik kigutaannik nakkutiginnilluartut naammattoortarpaat, ilaalli annertuumik paasisitsiniaanermik tunineqarnikuunnginnamik meeqqamik kigutigissuunissaannik suliniarnerat killeqartarnerarpaa.
Olga Berthelsen ippassaq oqarpoq, angajoqqaat akisussaassuseqannginnerunerat, sulisussaqannginneq imaluunniit paasisitsiniaanikippallaartarneq isorliunerusuni meeqqat inuusuttullu ajornartorsiutaannut pissutaanngitsoq. Allappoq peqqinnissaqarfimmi sulisut pikkorinnerulertariaqariaqartut. Taama oqarnera Emilia Jensenip illuatungilerusuppaa.
- Akisussaaffik annertuumik kigutileriffiup ukiorpassuarni tigummisimavaa. aamma angajoqqaat namminneq oqartarput meeqqamik atuarfimmi kigutitik errortarmatigit angerlarsimaffinni annerusumik errortanngikkaat, Emilia Jensen oqarpoq.
Erseqqissarpaa meeqqat peqqissunik kiguteqassappata angajoqqaat, meeqqat inuusuttullu namminneq suleqataanerusariaqartut.
Emilia Jensen aamma oqarpoq, kigutigissuunissamut ukiunut qulinut tullernut suliniutit aallarteriikkatik maanna kinguneqarlualereersimasut. Suliniummi pingaartinneqarpoq angajoqqaat meeraq naalungiarsuutilluguli kigutigissarnissaanik ilinniartinnissaat.
Uummannami kingutilerisut illoqarfimmi nunaqarfinnilu arfineq-marlunni innuttaasut isumagisarivaat.
