Kigutaasiortut naammanngillat

Nunatsinni kigutaasiortutut ilinniagallit 10-it naammanngillat kigutaarsartaartussat pisariaqartitaannik naammassinnissallutik. Nunatsinni pisortat kigutileriffii 15-upput, kisianni kigutaasartaartussat utaaqisorpassuupput. Pisarneq malillugu utaqqisut allattorneqartarput amerlanertigut ukiuni marlunni amerlanerniluunniit utaqqisariaqartarlutik.

Taamaattumik kigutaasiortut allatut ajornartumik najugarisartik qimallugu kigutileriffinnut allanut angalatinneqartariaqartarlersimasut Nuummi kigutaasiortoq Malu Krogh oqarpoq.

Nunatsinni kigutilerisut qullersaata Frank Senderovitz-p kigutaasiortut ulapinnerat ima tunngavissiorpaa.

- Kalaallit Nunaani kigutaasiortut atugaat ullumikkut qiviarutsigit suliassatsigut kinguaattooqqavugut, tassa iluarsaassassat aammalu kigutaasiassat pisariaqartitat eqqarsaatigalugit, taama oqarpoq Frank Senderovitz. Siunissaq ungasissoq isigalugu kigutisissuunissamik anguniagaqarnissamik paasitsitsiniaaneq -ukiut siuliini suliniutigalugu iluatittarsimasoq kikkunut tamanut ajornanngilluinnartoq suliassarileritsik aamma oqarpoq.

- Tassa illit namminerpiaq piumaguit aaliangersinnaagakku qanoq kigutigitsiginissat, Frank Sendorovitz nassuiaavoq.

Piffissami aggersumi kikkunnut tamanut qiimasumik paasitsitsiniaasoqalerpoq, tassalu aprilip 18 –ani nuna tamakkerlugu kigutigissarnerup ulluatut aaliangerneqarmat.

Ulloq taanna nunatsinni kigutileriffiit tamarmik kigutigissarneq pillugu aaqqissuussissapput.

- Neriuppunga ulloq taanna pisoqarfiorujussuarumaartoq tassami nunarsuarmi siullerpaamik aatsaat kigutigissarnerup ulluanik pisoqalerpoq, aamma neriuppunga assersuutigalugu angajoqqaat sunnerneqarumaartut meerartaarunimmi meerartaassammata peqqissunik kigutilinnik paarilluaraannilu kigutit peqqittuaannartussaammata, Senderovitz naggasiivoq.