Kigutaasartaarnissamut utaqqisunut allattorsimaffisut siunissamut qaqugorsuarmut nungunnavianngillat kigutileriffiit 16 –it nunatsinniittut tamarmik kigutasaasiortoqaleraluarpataluunniit, taama oqarpoq nunatsinni kigutilerisut qullersaat Frank Senderovitz.
Taamaattumik kigutaasiortut kigutaasiortoqarfiunngitsunut angalanerannut aningaasartuutit pisariaqartumik aningasartuutaapput.
Nunatsinni kigutit nakorsaasa qullersaat Frank Senderovitz oqarpoq, Kalaallit Nunaani kigutileriffeqarfiit 16 –usut akornanni arfinilinni kigutaasiortoqartoq, tassalu taakku arfinillit akornanni kigutileriffimmi ataatsimi sisamat atorfeqartinneqartut, tassa katillugit kigutaasiortut qulit nunatsinni pigineqarput. Taakkualu kigutileriffimmi sulinermik saniatigut kigutileriffeqarfinnut kigutaasiortoqarfiunngitsunut angalasariaqartarput, piffissani soorlu sapaatit akunnerini marlunni, pingasuni sisamaniluunniit suliartortarlutik.
Siorna 2006 –mi taamatut angalatitsinermut ineqarneq ilanngullugu aningaasartuutaasimapput 530 tusind koruunit.
Frank Senderovitz isumaqarpoq utaqqisuni allattorsimasoqarnera ukiorpassuani attatissagipput innuttaasut kigutiminnik paarsinerat ullumikkutut taama isikkoqartillugu kigutaasartaarnissaq pisariaqartussammat.
-Kisianni sapinngisamik piaarnerpaamik inuit kigutigissuunissaannik sulissuteqarutta aammalu inuit suleqataalerlutik, taava aamma kigutaasiortut sukkasuumik suliatik naammassilertorsinnaalissavaat, kisianni isumaqarpunga utaqisuni allattorsimasut qaqugumut nungunnavianngitsut, taama naggasiivoq nunatsinni kigutit nakorsaasa qullersaat Frank Senderovitz.
