Kiffartuussinissamut isumaqatigiissutissaq akuerinngilaat
Nunaqarfinni inuussutissaanngitsunik nioqquteqarunnaarnissamik siunniussaq, isumaqatigiissutissami isorineqarnersaavoq. Nunaqarfimmiummi inuussutissaanngitsunik internetikkut pisiniartarnissaat siunniunneqaqquneqarmat.
Taamatut killilersuilerniarneq piniartunut aamma eqquissaaq, taakkumi piniutissatik aamma internetikkut pisiarisartussanngormatigik. Tamanna aningaasaqarnermut ataatsimiititaliap pissusissamisuunnginnerarpaa.
Suliassamut tunngatillugu Aningaasaqarnermullu ataatsimiitaliap oqaatsit sakkortugineqarsinnaasut atorpai:
- Kiffartuussinissamut isumaqatigiissutissaq qimerlooraanni inuit pisinnaatitaaffiinik unioqqutitsinertut taaneqarsinnaavoq, akuerineqassappammi nunaqarfinni isorliunerusunilu innuttaasunik kiffartuussinerup illoqarfinnut naleqqiullugu ajornerulerneranik kinguneqassammat. Allaammi kiffartuussinissamut isumaqatiissutissap ajorseriarnerata kinguneranik nunaqarfimmiut isorliunerusuneersullu nuuttut ima amerlatigilissagaluarput, allaat illoqarfinni atugarliortoqalissagaluarluni, aningaasaqarnermut ataatsimiititaliaq apeqqummut avissaartuutsitsisimasumut taama oqaaseqaateqarpoq.
Aningaasaqarnermut ataatsimiititaliami Demokraatit ilaasortaatitaat ikinnerussuteqarluni kiffartuussinissamut isumaqatigiissutissaraluamut akuersaaraluarpoq.
Ataatsimiititaliami ilaasortat amerlanerussuteqartut, tassa Inuit Ataqatigiinneersup, Siumumeersup aamma Atassummeersup kiffartuussinissamut isumaqatigiissutissap 2016-imi aatsaat sipaarniarfiusinnaanera isumaqatigiissutigisimavaat.