Kiffartuussinissamut isumaqatigiissutip sivitsornissaa utaqqiinnarpaat
Naalakkersuisut aamma inatsisartut aningaasaqarnermut ataatsimiititaliaata kiffartuussinissamut isumaqatigiissummik sivitsuinissaq akuersaarpassuk sulisut atorfinitseqqinneqassapput.
– Neriussimagaluarpugut isumaqatigiissut qaammammilluunniit ataatsimik sivitsorneqassasoq, tamannami Namminersornerullutik Oqartussanut allagaqaatigisimavarput. Ippassarli naalakkersuisut ataatsimiikkaluarmata tusagaqanngilagut, pisortaq Tønnes Berthelsen oqarpoq.
Namminersornerullutik Oqartussat Arctic Green Foodimut aningaasaliissutigisartagaat 17 millioni koruuniniit 8 millioni koruuninut aningaasanut inatsimmi 2009-moortumi appartinneqarput. Tamannalu tunngavigalugu Arctic Green Foodip kissaatigisimagaluarpaa, isumaqatigiissutip januaarip naggataani atorunnaannginnerani nutaamik isumaqatigiissusiornissaq. Taamaattoqanngimmallu sulisut 60-t missaanniittut soraarsitaagallarput.
Tunisassiorfiit ukiut pingasut qaangiuppata Nunatta Karsianit taperneqaratik imminulli napatillugit ingerlalersimassappata taperneqartarallarnissaq pisariaqartikkitsik, Tønnes Berthelsen erseqqissaavoq.
