Kiffartuussinissamik isumaqatigiissutit atsiorneqanngikkaluarlutik pituttugaasumik isumaqatigiissutaasut

Air Greenland kiffartuussinissamik isumaqatigiissutinut atsiorsimanngitsoq sisamanngormat saqqummerpoq. Taamaattoq kiffartuussinissamik isumaqatigiissutinut nutaanut isumaqatiginninniarnerit naammassereerput
Assi © : KNR
septembarip 30-at 2016 14:40

Attaveqaqatigiinnermut naalakkersuisoq, Knud Kristiansen Inatsisartut aningaasaqarnermut akileraartarnermullu ataatsimititaliaannut isumasioqateqarnermini taama oqartoq, Demokraatinit peqataasup Tillie Martinussenip oqaatigaa.

- Kiffartuussinermik isumaqatigiissutit atsiorneqanngikkaluarlutik, suliariumannittussarsiuussinermi kiffartuussiniartutut sassartut pituttugaasumik isumaqatigiissuteqalertartut, Naalakkersuisut akissutigaat, Tillie Martinussen oqarpoq.

Inatsisartut ataatsimiinneranni akileraartarnermut tunngassuteqartup oqaluuserineqartussaanera pissutigalugu aningaasaqarnermut akileraartarnermullu ataatsimiititaliami isumasioqatigiinneq unikkallartinneqaraluartoq, isumasioqatigiinnermi pingaaruteqartunik oqaluuserinnittoqartoq, Demokraatinit oqaatigineqarpoq.

- Innuttaasut akornuserneqannginnissaat anguniarlugu suliamik naammassinninniarsarissalluni aningaasaqarnermut ataatsimiititaliap oqaatigigaa qularutigineqassanngilaq, Tillie Martinussen KNR-imut oqarpoq.

Attaveqaqatigiinnermut naalakkersuisoq, Knud Kristiansen, isumasioqatigiinnissamut Inuit Ataqatigiinnit aggersarneqarpoq. Aqqaluaq B. Egedelli isumasioqatigiinnerup unikkallarnerani suna oqaluuserineqarsimanersoq oqaatigerusunngikkallarpaa.

- Isumasioqatigiinneq oqaaseqarfigisinnaanngikkallarparput. Aamma aningaasaqarnermut ataatsimiititaliap suliaq suli ingerlappaa, erseqqissumillu paasisaqarnissatta tungaanut suliaq ingerlanniarparput. Taamaammat ataatsimiititaliap sulinini naammassinissaa tusagassiortut utaqqisariaqassavaat, Aqqaluaq B. Egede isumasioqatigiinnerup matoqqasuunera innersuussutigalugu oqarpoq.