Innuttaasut kiffartuussinissamik isumaqatigiissutinut akerliullutik iliuuseqalersut

Kujataamiut akerliullutik 'Kujataani Angallassilernissamut isumaqatigiissummut Akerliuneq' qulequtaralugu  kiffartuussinissamik isumaqatigiissutit nutaat akerleralugit atsiornernik katersipput. Tallimanngornermi ullaap tungaani inuit 320-t sinnerlugit atsioreersimapput sulilu amerliartorlutik.

Atsiornernilli katersuineq kisiat atorlugu akerliussutsimik takutitsiniartoqanngilaq. Kiffartuussinissamik isumaqatigiissutit akerleralugit akerliussutsimik takutitsiniartut pilersaarusiornissamut Qaqortumi arfininngorpat nalunaaqutaq 15.00 naapinniarput. Akerliussutsimik takutitsinissamut maannamut inuit 130-t peqataaniarlutik facebookikkut nalunaarsimapput, akerliussutsimillu takutitsinissaq Kommuneqarfik Sermersuumi kommunalbestyrelsimut ilaasortaasimasup Monica Dorphip aaqqissuussaraa.

Kujataani innuttaasut isumaqatigiissutit naammaginagit akerliupput. Nutaanik isumaqatigiissusiortoqarneratigut assartuinerup annersaa angallateeqqat umiarsuillu atorlugit pissaaq, timmisartut suluusallit qulimiguullillu atornagit. Tamatumunnga peqatigitillugu innuttaasut ilarpassui isumaqarput angalaneq akisunerulissasoq.

Borgmesterip aamma naammaginartinngilaa

Poliikerit akornanni naammagineqanngitsoq aamma malunnarpoq. Kiffartuussinissamik isumaqatigiissutit nutaat Kommune Kujallermi naammagineqanngilluinnarput.

Angallassinissanik taamaatitsisariaqarnerni kinguaattoornernilu uninngatitaanerup kimit akilerneqarnissaa pillugu kiffartuussinissamik isumaqatigiissutigineqartuni allassimasoqarnissaa kommunip ilaatigut ujartorpaa, aamma angallassisut assigiinngutsuugaluartut innuttaasut billetsinik ataasiinnarmit pisiffissaqarnissaanik piumasaqaateqarnissaq kiffartuussinissamik isumaqatigiissutini nutaani kommunip ilaasariaqarsoraa.

Borgmester Jørgen Wæver Johansen aamma inuussutissarsiornermut ataatsimiititaliap siulittaasua, Simon Simonsen, tusagassiorfinnut nalunaaruteqarlutik taama allapput.

kiffartuussinissamik isumaqatigiissutit isumaqatigiinniutigineqarneri komminip akuutinneqarsimannginnera naammaginartinnagu naqissuserpaat. kommuni Namminersorlutillu Oqartussat piaartumik ataatsimiittariaqartut, kiffartuussinissamik isumaqatigiissutit kingunerisassaat aaqqiissutaasinnaasullu eqqartorlugit.