TUSAGASSIUUT: Kiffartuussinissamik isumaqatigiissutissat atsioqatigiissutigineqanngitsut
Ineqarnermut, Sanaartornermut Attaveqarnermullu Naalakkersuisoqarfimmi immikkoortortaqarfimmi pisortap Andreas Østbirkip Nuuk TV-mut tamanna uppernarsarpaa.
Illoqarfiit nunaqarfiillu akornanni assartuussineq pillugu kiffartuussinissamik isumaqatigiissutit isumaqatigiinniutigineqarneri naammassineqarsimasut Naalakkersuisunit septembarip 13-iani nalunaarutigineqaraluarpoq.
Attaveqarnermut naalakkersuisoq Knud Kristiansen taamani ima oqarpoq:
- Nuannaarutigalugu nalunaarutigissavara isumaqatigiinniarnerit pitsaasumik angusaqarfiulluartumillu naammassineqarmata. Angusaq iluarisimaarluarpara, naalakkersuisoq taama oqarpoq.
Isumaqatigiinniarnerilli suli naammaassivissorneqarsimanngitsut maanna paasinarsivoq.
Kiffartuussinissamik isumaqatigiissutinut ukiumut 121,4 millionit koruunit immikkoortinneqarsimapput.