Kiffartuussinermut akiliutit utertinniarpaat
Sinersortaammut Sarfaq Ittuk-mut ilaasussaraluit atorsinnaanngisaminnik bilitsillit kiffartuussinermut akiliutaat Tele-Postip utertinniarpai.
Tamanna pisussanngorpoq umiarsuaq Danmarkimut iluarsaatsikkiartorluni utertariaqalermat, angalasussaraluillu aallanngitsoortussanngorlutik.
Ilaasussaraluit bilitsit akiisa utertinnissaannut periarfissaqartuarsimapput, kisianni kiffartuussinermut akiliut aallaqqaammut allakkerisarfiup tigummiinnarniarsarisimagaluarpaa.
Kiffartuussinermut akiliut bilitsimut ataatsimut 140 koruuniuvoq.
Kisianni ilaasussaraluit aallarsinnaajunnaartut 140 koruunit ilanngullugit maanna utertissinnaalerpaat.
- Angalanissat taamaatinneqarnerannut atatillugu kiffartuussinermut akiliutip utertinnissaa aalajangiupparput, Benedikte Jensen oqarpoq, taanna allakkerisarfimmi inunnut ataasiakkaanut tuniniaanermi pisortaavoq.
Aammattaaq Vejle Rejser aalajangersimavoq bilitsip akia kiffartuussinermullu akiliut utertinniarlugit. Angalatitseqatigiiffiup bilitsimut ataatsimut kiffartuussinermut akiliutigitittaraluarpaa 350 koruunit, taakkuli angalasussaraluit sinersortaatip iluarsaanneqarnerata nalaani aallarsinnaanngikkunik utertissinnaanngorpaat.
