Kiffaqkontop akiitsut appartissavai

Pisortat innuttaasut akiitsuinik akiliisitsiniiarnermut sulianik 260.000-inik amerlassusilinnik ingerlataqarput, taakkualu katillugit 800 millioni koruuninik naleqarput. Allatut oqaatigalugu, akiitsoqarneq peqqutigalugu, innuttaasut tamarmik ataasiakkaarlutik agguaqatigiisillugu 4,6-eriarlutik pisortani suliassaqarfigineqartartut.

Akileraartarnermut Atugarissaarnermullu Ataatsimiititaliap siunnersuutigaa innuttaasut kontomik Kiffaqkontomik atilimmik nammineq piumassuserinngisaminnik pilersitsiffigineqassasut. Tassalu pisortanit ikiorsiissutit, utoqqalinersiutit ineqarnermullu tapiissutit aningaaserivimmi Kiffaqkontomut toqqaannartumik ikineqartassasut siunnersuutaavoq.

Kiffaqkontomit akiligassat, tassaasut akileraarutit, inimut akiligassat, eqqagassalerinermut akiligassat aamma soraarnerussuteqalernissamut ileqqaakkanut akiliutit kontomut ikineqareeraangata, aningaasat sinneri nammineq atorneqarsinnaanngortassasut, ataatsimiititaliap siunnersuutigaa.

Assersuutigalugu eqqaavinnut akiligassaq, 400 koruunimik annertussusilik pisortanik 20-eriarluni suliaqartitsisisarpoq. Tassa akiligassap innuttaasumut nassiunneqarneranit pinngitsaaliinikkut akilersinneqarnissaata tungaanut uteqattaarsinnaasarpoq.

Nunatsinni innuttaasoq agguaqatigiissillugu 22.000 koruuninik amerlassusilinnik akiligassaqarpoq.