Kiffaanngissuseqartumik tusagassiornerup saassutarineqarnera Aleqap akueriumanngilaa
Palle Christiansenip Demokraatineersup § 37 naapertorlugu apeqquteqaataanut akissummi tamanna erserpoq.
Taamatut oqaaseqarsimanera isumaqatiginngikkaluarlugu naalakkersuisut siulittaasuat aamma oqaaqqissaarivoq.
- Naalakkersuisut isumaqarput tusagassiortut suliani tamatigoortuuneq qulakkiissallugu pisussaaffigigaat, taamalu illuinnaasiorluni tusagassiuineq ingerlatarissanagu, Aleqa Hammond akissutimini taama allappoq.
Naalakkersuisooqatigiinnissamik isumaqatigiissummi tamannarpiaq aamma nalunaarutigineqarpoq. Tusagassiorfiit tamatigoortuunissaat tassani aamma pingaartinneqarluni.
Politikerit tusagassiorfiit sulinerannut akuliunniarnerat pillugu oqallinneq piffissami kingullermi qaqeqqinneqarpoq, ilaatigut tusagassiornermut akisussaasuulluni naalakkersuisoq, Nick Nielsen, Siumut, Randi Brobergilu Partii Inuit sinnerlugit Inatsisartunut ilaasortaasoq, KNR-p pisortassaanik atorfinitsitsiniarnermi suut piumasaqaatigineqarnissaannut tunngasunik allaaserisaqarsimallutik.
