Kielsenip Thorning ataatsimeeqatigissavaa
Nunat siuttuisa pissutsit Danmarkimut Kalaallit Nunaannullu tunngasut eqqartussavaat.
Oqaluuserineqartussatut ilimanaateqartut ilagaat nunatta karsiata ilisimaneqareersutut 2014-imi millioninik hundredelinnik amigaartooruteqarfiunera.
Namminersorneq pillugu isumaqatigiissut naapertorlugu Danmarkimit ataatsimoortumit tapiissutit annertuseqqinneqartussaanngillat. Danskilli ministeriunerata arlaleriarluni oqaatigereerpaa kalaallit suliffeqarfii naalagaaffiup ineriartortitsinermut aningaasaateqarfianit taarsigassarsisinnaasariaqartut. Tamannalu Folketingimi ungasinngitsukkut akuersissutigineqarnissaa naatsorsuutigineqarpoq.
AAMMA ATUARUK Nunatta Sinniisoqarfia Københavnimiittoq ukiortaami ilasseqatigiinnissamut qaaqqusisoq
Tamatuma saniatigut danskit kalaallillu tungaannit danskit naalakkersuisui kajumissaarneqarsimapput aningaasaateqarfimmut naalagaaffimmit namminersortunillu ingerlanneqartumut aningaasaleeqqullugit, aningaasaat taakku Kalaallit Nunaanni inuussutissarsiutitigut suliniutinik aallartisaanissamut atorneqartussanngorlugit.
Aaqqissuutissarli taanna Helle Thorning-Schmidtimit maannamut akuerineqarsimanngilaq.
Kim Kielsenip ministeriunermik ataatsimeeqateqarnermi saniatigut aamma ukiortaami ilasseqatigiinnissamut qaaqqusisuuvoq, ministerit, nunat aallartitaat nunattalu ikinngutai qaaqquneqarsimallutik. Tamannalu Nunatta Sinniisoqarfiani Københavnimiittumi aqagu sisamanngornermi pisussaavoq.