Assi: KNR

Kielsenip naalakkersuisooqatigiivi nutaat: Demokraatit naalakkersuisooqataalersut

Siumup siulittaasuata, Kim Kielsenip naalakkersuisooqatigiit nutaat saqqummiuppai. Siumut, Demokraatit Nunatta Qitornaalu naalakkersuisooqatigiilerput.

Naalakkersuisuni nutaanik naalakkersuisooqatigeeqalerpoq.

Demokraatimmi Siumut Nunatta Qitornaalu naalakkersuisooqatigilerpaat.

- Demokraatit Naalakkersuisunut ilaalernerat nuannaarutigaara. Aammattaaq ataatsimoorluta isumaqatigiissuteqarsinnaagatta nuannaarutigaara, Siumup siulittaasua, Kim Kielsen oqarpoq.

Demokraatinut isumaqatigiissuteqarnissaq pingaaruteqartoq ilanngullugu oqaatigaa, taamaalillutimmi coronap ajornartorsiortitsinerata nalaani artukkiutigineqartunut oqilisaataassammata.

- Ulloq uatsinnut angisoorujussuusimavoq, aalajangersinnaasimagaluarparput ikorfartortaaginnarnissarput. Nunatta ilungersunartorsiorfiani akisussaaffimmik tiguserusuppugut, Demokraatit siulittaasorigallagaat oqarpoq.

Vittus Qujaukitsup mittarfiit pillugit pilersaarutit Ilanngaassivillu Demokraatit ikorfartuineratigut akuerineqarsimasut suliarinerisa nanginneqarnissaat qilanaaralugu erseqqissaatigaa.

Aningaasaqarnermut naalakkersuisup, Vittus Qujaukitsup naalakkersuisut inuussutissarsiortunut ikiorsiissutaannit, 257 millionit koruuninit atuisoqarpallaarsimanngitsoq nassuerutigaa.

Inuussutissarsiortunut ikiorsiissutit juunip ulluisa 31-anut atuuttut sivitsorneqarnissaat misissoritsik oqaatigaa.

Naalakkersuisoqatigiinnerup Ineriartorneq, Patajaassuseq Toqqissisimanerlu qulequtarai.

Demokraatit naalakkersuisuuffigiligaat

Demokraatit naalakkersuisooqatigiinni nutaani akisussaaffiit ilaannit tigusipput.

Steen Lynge nunanut allanut tunngasunut nukissiuuteqarnermullu naalakkersuisunngorpoq.

Anna Wangenheim peqqissutsimut naalakkersuisunngorpoq.

Jens Frederik Nielsen demokraatit partiimi allatsigilerlugu nukissiuuteqarnermut aatsitassaqarnermullu naalakkersuisunngorpoq.

Demokraatit siulittaasorigallagaat, Nivi Olsen naalakkersuisunngorani naalakkersuisutut atuuffiit Demokraatinut allanut atortussanngortippai.

Vittus Qujaukitsoq aningaasaqarnermut naalakkersuisuuginnassaaq.

Siumut Demokraatillu ataatsimeersuangajalersut

Siumup Demokraatillu ataatsimeersuangajalerneranni naalakkersuisoqatigiit nutaat pilersinneqarput. Ataatsimeersuarnerilli taakku qanorluunniit inerneqaraluarpata, naalakkersuisoqatigiit uku ataannassasut, Kim Kielsenip Nivi Olsenillu neriorsuutigaat.

Coronap ajornartorsiortitsimmat, naalakkersuisoqatigiinnermut isumaqatigiissutaasimasup allanngortiteriffigerujussuarnissaanut periarfissaqarsimanngitsoq, Kim Kielsenip oqaatigaa.

Angusassanilu nutaani coronap ajornartorsiortitsinera pissutigalugu pisortat aningaasartuutaanni suut sipaarneqarsinnaanersut nalilersuiffigissavaat.

Akitsuutinilli qaffaasoqassanngitsoq, Nivi Olsenip neriorsuutigaa.

Anguniagassanilu nutaani ilaatigut atuarfeqarnikkut ilinniartitaanikkullu aaqqissuusseqqinniarput, aalisarnermut inatsisip nutarterniarpaat, illoqarfinni nunaqarfinnilu tunitsiviit piorsarniarpaat tunngaviusumillu inatsisissaq pillugu sulinerup nangissallugu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat