Kielsenip kunngikkormiunik angalaqateqaqqaarnini nuannareqaa
Qaammatit arfineq pingasut missaanni Naalakkersuisut siulittaasooreerluni Kim Kielsen siullermeerluni kunngikkormiut tikeraarneranni tikeraartitsisuuvoq, angalanermilu ullut siullit arfinillit angalaqatigereerlugit nuannisaqaaq.
- Nuanneqaaq, maani angalaqatigalugit, tikilluaqqusaanerput aamma kunngikkormiut tikilluaqqusaanerat tulluusimaarnaqaaq. Tikilluaqqusisorpassuit inuppalaartupilussuarmik ingerlasut. Nuannivissumik ingerlasarpoq, Kim Kielsen KNR-imut oqarpoq.
Aamma atuaruk ASSIT Kunngikkormiut Ukkusissani
Tikeraartitsisuugami kunngikkormiut ilaanni kisimeeqatigisarpai. Sunali oqaluuserisarpaat, itinerusumik tamanna oqaluttuarinngikkaluarlugu oqaaseqartarnerarpai.
- Ila oqaaseqartarput soorunami, aamma kisimeeqatigerujoorlugit tassa oqaaseqaqattaartarput. Nuannisartaqaat, taamak oqaatigerusuppara, nuannersuinnarnik oqariartuuteqaqattaarput, aamma angallavigisaminni tikittarnikuusaminni, siornatigut tikittarnikuusaminni tassa aamma nuannisartaqaat, taama oqaluttuarpoq.
Aamma atuaruk Dronningip tikeraarnermini ullut siulliit misigisalikkersaarutigai
Ulluni siullerni kunngikormiut angalaqitiginerini Kim Kielsenip misigisamini oqaasinngortikkusunnerusai tassaapput innuttaasut kunngikkormiunik tikilluaqqusisarneri:
- Tuppallernaqaaq, kalaaleqatigut taamatut tikilluaqqusisaqattaarneri, Ataqqinartorsuaq dronningi tikilluaqqusarpaat uummammik pisumik kissalaartumik, nuannersumik tassa tikilluaqqusisarput. Nuanneqaaq isigalugit, Kim Kielsen oqarpoq.
Ullumi ullaap tungaa kunngikkormiut aamarutissarsiorfiusimasumut Qullissanut tikimmata tikilluaqqulluarneqarsimanissaat ilimanarpoq, Qullissarmiuusimasummi arlallit tikilluaqqusinissamut piareersimapput.
