Kielsenip aningaasanut inatsit assortuussutaasoq illersoraa
Naalakkersuisut siulittaasuat, Kim Kielsen, tusagassiortunik ataasinngormat katersuutsitsivoq. Aningaasanut inatsisip isorineqartorujussuup taassuminnga assuarliisut oqarneratulli taama isornartoqartiginngitsoq taassuma nalunaarutigaa.
Tasiilami meeqqat atornerlugaasimasut, inuuniarnermikkullu ajornartorsiuteqartut ukioq manna ukkatarineqangaatsiartut Namminersorlutik Oqartussaniit qanoq iliuuseqarfiginiarneqarnersut ilaatigut apeqqutigineqarput.
Danmarkimiit 80 mio. koruunit ikiorsiissutissatut tunniunneqartut, Naaalakkersuisut sisamararterutaat atussallugit aalajangiussimavaat.
AAMMA ATUARUK Naalakkersuisut meeqqanut ajornartorsiortunut 7,5 milliuunit koruunit tungaannut aningaaaliisut
- qallunaat nunaat tassa ukiut tulliit sisamat 80 millionit koruuninik immikkoortitsivoq. Uagullu aningaasat tungaatigut annertusaavugut. Tassa 100 millionit sinnerlugit, ukioq manna aallarnerfigalugu Naalagaaffik peqatigalugu aningaasaliisoqarneruvoq, Kim Kielsen oqarpoq.
Tassalu Naalakkersuisut ukiunut sisamanut tulliuttunut 20 millionit koruuninik aningaasaliisussanngorput.
Naalakkersuisut ukiumut 7,5 millionit koruunit tungaannut meeqqanut inuuniarnermigut ilungersuuteqartunut, tassa katillugit ukiuni sisamani 30 millionit koruunit aningaasaliissutiginiarlugit siusinnerusukkut ilisimatitsissutigaat. Tamaanniarpasinngilarli.
Sillimmatinut konto
Aningaasaqarnermut naalakkersuisoqarfiup ilisimatitsissutigaa, nunatta aningaasaliissutai, aningaasaliissutit tamarmik sumut atorneqarnissaannik Kalaallit Nunaat Danmarkilu isumaqatigiinissaasa tungaannut, sillimatinut kontomut inissineqassasut.
Aningaasat 7,5 millionit koruunit sillimmatitut kontomi inissisimapput, aningaasalli ajunaarnersuaqarnissaanut, nunatsinnilu ilisimatuutut misissuisarfissamut aamma atorneqartussatut aalajangersimapput.
Pisortat isumagininnermut assut iliuuseqareernerannik, inuillu ataasiakkaat iliuueqarnerusariqarnerannik, nunatta aningaasaliinerunnginneranut Kim Kielsenip tunngavilersuutigaa.
- Pisortat, uani meeqqanut tunngatillugu suliaat annertuupilussuupput. Kisianni uagut nammineq inuttut ataasiakkaatut iliuuserisassagut annerusariaqarput. Meeqqat taamak amerlatigisut angerlarsimaffiit avataanut inissinneqarnissaat taanna akuersaarneqarsinnaanngilaq.