VIDEO Kielsenip ammaanermi oqalugiaataa nersualaarneqarlunilu isornartorsiorneqarpoq
Oqalugiaat quppernernik aqqaneq marlunnik takissusilik iluarisimaarneqarpoq.
- Tassa tamakkiisumik isigissagaanni uagut Atassumminngaanniit iluarisimaarparput taavalu aamma isumaqataaffigalugu, Steen Lynge Atassummit inatsisartunut ilaasortaq KNR-imut oqarpoq.
- Ataatsimut isigalugu ajunngitsorujussuuvoq, piviusorsiortorujussuullunilu, Randi V. Evaldsen Demokraatinit inatsisartunut ilaasortaq KNR-imut oqarpoq.
Aammali imaqarnerusinnaasorineqarpoq.
- Imartuvoq soorunami aamma suliassaqarfiit amerlasoorpassuit oqaaseqarfigai. Kisianni amigaatigilaarpara Nunatta qanorpiaq ineriartortinnissaanut aammalu innuttaasut neriuuteqarnissaannut arlaatigut nukittunerulaartumik oqaaseqarfigisimaneqarsimanissai, Sara Olsvig Inuit Ataqatigiinnit inatsisartunut ilaasortaq KNR-imut oqarpoq.
Aamma atuaruk Ataatsimiinnermut ammaanermi oqalugiaat takorluugaqanngitsoq
Ilaasa oqalugiaatip takissusaa iluarigaat.
- Tassami tusarnaakatannarsisarpoq, aamma inuiaqatitsinnut, takivallaarpat, ajunngitsorujussuartut nalilerusuppara aamma takissusaa takerujussuaranilu tigussaasorujussuummat, Randi V. Evaldsen oqarpoq.
Allat Inatsisartuni oqaluttarfimmit tunngavilersuisoqarnerusassasoq kissaatigaat.
- Naalakkersuinikkut siuttuugaanni aamma soorunami oqariartortoqarsinnaasariaqarpoq aajukua uagut aqqutissiuukkumavagut uunnga imatut ingerlatitsilluta, taannalu uani amigaatigilaarpara, Sara Olsvig oqarpoq.
Imarisaat tikikkaanni aningaasaqarniarnerup aaqqeriarnissaa oqaliaatigineqarmat inissaminiippoq.
- Aningaasaqarniarneq pitsaasumik inississagutsigu taava arlaatungaatigut iliuuseqarnissaq pingaaruteqarpoq, Steen Lynge oqarpoq.
Inatsisartuni ukiakkut ataatsimiinnermi oqalugiaat siulleq oqaatsit pingasut atorlugit ima ilisaritinneqarsinnaavoq:
- Piviusorsiortoq, tigujuminartoq taavalu siumut isigisoq, siunissamut, Randi V. Evaldsen oqarpoq.
- Piviusorsiortuusoq, kisianni piviusorsioraluarluni takorluukkanik imaqarnerusimasinnaagaluarpoq, taavalu aamma immaqa oqaatsit atorneqartut tekniskiungaatsiartut, soorlu atorfilittat allassimasaattut isikkoqarlutik, Sara Olsvig oqarpoq.
Ukiakkut ataatsimiinneq Inatsisartut nittartagaatigut toqqaannaq malinnaaffigisinnaavat.