Kielsen USA-miimmat Naalakkersuisunut akerliussutsimik takutitsineq kinguartinneqarpoq

Nunatsinni politikerinut ingammillu Naalakkersuisunut akerliussutsimik pingajussaanik takutitsinissaq peqatigiiffimmit "Naammaleqaaq"-mit arfininngornermi pilersaarutigineqaraluarpoq, Naalakkersuisulli siulittaasuat, Kim Kielsen nunatsinni uuliamik gassimillu nittarsaassiartorluni ulluni makkunani Texasimiimmat, akerliussutsimik takutitsinissaq kinguartippoq.

Peqatigiiffimmik pilersitseqataasoq Paninnguaq Louisa Rosing taama oqarpoq.

- Kim Kielsen Texasimiimmat, akerliussutsimik takutitsineq kinguartipparput, Paninnguaq Louisa Rosing oqarpoq.

Qaqugumut kinguartinneqarnersoq nalugallarpaa.

"Naammaleqaaq! Nok er nok!" inunnit naammaginninngitsunit Facebookkimi aallartippoq. 4200-llu maanna ilaasortaapput.

AAMMA ATUARUK Pingajussaanik misiliilersut: Inatsisartut saanni arfininngorpat akerliussutsimik takutitsisoqassasoq

Peqatigiiffik akerliussutsinik takutitsinernik marlunnik mamakujuttunut, sukkunut tupanullu akitsuutit Siumumit, Nunatta Qitornaannit Demokraatiniillu siorna novembarip naanerani akuersissutigineqaqqammersut aaqqissuussivoq. Nunatta aqunneqarneranut naammaginninngitsoqareersoq akitsuutit naammagittarsinnaajunnaartitsipput.

Naalakkersuisut meeqqanik atugarissaarnissamillu salliussinatik mittarfinnik ingerlatseqatigiiffiillu akileraarutaannik appartitsinissamik salliussisut, akerliussutsimik takutitsisut isumaqarput.

Akerliussutsimik takutitsisut piumasaqaataat Kim Kielsenip novembarimi akerlilerpai.

- Inuit ataasiakkaat pujortassanerlutik, immiaarartussanerlutik imaluunniit sioraasanik puussianilluunniit pisissanerlutik namminneerlutik aalajangissavaat. Namminneq toqqagassaraat, Kim Kielsen KNR-imut taamani oqarpoq.

- Eqqaamaneqassaarli, innuttaasut qinersereerput. Tamat oqartussaaqataanerannik qinersinikuupput, taakkualu amerlanerussuteqarnikkut Inatsisartut aalajangerpaat Naalakkersuisut qanoq ingerlassanersut, Kim Kielsen taamani oqarpoq.

Tamatuma kingorna akerliussutsimik takutitsisoqaqqinngilaq, Inatsisartullu ukiakkut ataatsimiinnerat naammassilluni. Naalakkersuisunulli suli akerliusoqarpoq.