Kielsen ukiortaami oqalugiaataa: Ukioq 2021 namminiilivinnissamut aqqutissiuussissaaq
Ukioq 2020 nualluussuaq coronavirus sutigut amerlasuutigut Kalaallit Nunaannut unammillernarsimavoq.
Taamaakkaluartoq innutaasut inuussutissarsiutinillu ingerlataqartut coronavirus pinaveersaartinniarlugu ilungersorput aningaasarsiornerlu iluatsissimalluni.
Taama oqarpoq, Naalakkersuisut siulittaasuat Kim Kielsen ukiortaami oqalugiarami.
Corona pillugu ajornartorsiortitsineq ukiortaami oqalugiarnerani inituvoq.
Inuit ulluinnarni inuunerminnik allannguisariaqartarsimapput, tassanilu oqartussaasut innersuussutaannik malinnissimanerannik Kielsenip oqalugiarnermini nersualaarpai.
AAMMA ATUARUK Dronningip aasaru nunatsinnukarsinnaassalluni neriuutigigaa
- Kissaatigaara nualluussuup atuunnerani ataatsimoorneq takutitarsi nualluussuup qaangiunnerani attatiinnarumaaripput, siulitta imminnut ikioqatigiittarnerisa anersaavanik takutitsilluinnartuummat, Kim Kielsen ilaatigut taama oqarpoq.
Naalakkersuisut siulittaasuata aningaasarsiorluarnerup pisariaqassusia eqqaavaa, taassumalu ineriartuinnarnissaa.
Mittarfiliornerit nutaat oqalugiarnermini eqqaavai aamma namminersorlutik oqartussat suliffeqarfiutaanni Air Greenlandimi aamma Royal Greenlandimi aningaasaliinerit nutaat eqqaaneqarput.
Oqalugiarnermini saqqummiussinermini Naalakkersuisut ukioq 2021-mi takornariartitsinermut periusissiamik nutaamik, siumut isigisumik pilersitsissasut oqarpoq, 2020-mi nalaassimasat pilertortumik qaangerneqarnissaat aqqutissiuukkumallugu.
Namminiilivinnissamut periarfissat qulakkeerneqarnissaat
Ukioq qaangiuttoq oqaluttuarisaanermut tunngassuteqartunik arlalinnik pisoqarfiuvoq.
Ukioq taanna, danskit ministeriunerat Mette Frederiksen naalagaaffik sinnerlugu utoqqatserpoq, kalaallit meerartaat 22-it 1951-mi misiliutitut Danmarkimut aallartitaasimanerat pillugu.
Kalaallit politikeriisa suliami akuusimanerat pillugu Naalakkersuisut utoqqatsertariaqannginnersut oqallisigineqarmat, tamanna Naalakkersuisunit itigartitsissutigineqarpoq.
Kim Kielsenip ukiortaami oqalugiaataani utoqqatsertoqarnissamik ilaqanngilaq.
- Maannalu Naalagaaffiup utoqqatsertoqareernerata kingorna pineqartut ajunnginnerpaamik inuunerminnilu pitsaasumik ingerlariaqqinnissaannik qamannga pisumik kissaappakka, Kim Kielsen taama oqarpoq.
Ukioq 2021 nalliuttorsiorfiusussaavoq. Hans Egedep tikinneranit ukiut 300-inngussapput aammalu kunngikkormiut nunatsinnut tikeraaqqaarnerannit ukiut 100-unngussallutik. Taamaammat ataqqinartorsuup Dronning Margrethe II, tikeraarnissaa piareersarneqarpoq
Kim Kielsenip oqanera naapertorlugu kalaallit Nunaata namminiilivinnissaa qulakkeerneqassaaq periarfissat atorluarnerisigut ilungersorlunilu sulinikkut.
- Qularutiginngilara ukioq nutaaq 2021 sorpassuartigut nunatsinnut angusaqarfiulluarumaartoq, Kim Kielsen ukiortaami oqalugiarami ilaatigut taama oqarpoq.
