- Nunarput ineriartortissavarput, tikilluaqqussavagut nunatsinnukartut suliartorlutik siuariartortitsillutillu, kisianni uagut piumasaqaatigut tunngaviussapput, Kim Kielsen oqarpoq.Assi: KNR

Kielsen paatsuugassaanngitsumik oqartoq: Nunanit allanersunut politikkip tigunissaa piffissanngorpoq

Nunanit allaneersut pisortat suliffeqarfiutaanni sulilersut oqaatsitsinnik attaveqaatit aqqutigalugit ilinniartinneqartalersinnaanissaat naalakkersuisut siulittaasuata periarfissaatikkusuppaa, sulisullu atorfitik tigummiinnarniarunikkut soraarummeernerni anguseqqaartassallutik.

Nunarput suliassaqarfinnik Danmarkimit ukiuni aqqanilinni tigusisimanngeriarluni, nunanut allanut suliassaqarfik naalakkersuisut siulittaasuata Kim Kielsenip Kalaallit Nunaannut maanna oqqukkusuppaa.

Kim Kielsen tusagassiutinut sisamanngornermi unnukkut taama nalunaaruteqarpoq.

Mittarfissualiortoqaleruttornerata nalaani, Isfjordcenterip Ilulissani aallartinnerani, akunnittarfiliortitertoqaleruttornerani, aatsitassarsiorfillu ammarsimasoq, piiaasinnaanissamillu akuersissut nutaaq alla tunniunneqarsimalersorlu, sulisut nunanit allaneersut amerlanerusut sulisorineqalernissaat avaqqunneqarsinnaanngitsoq Kim Kielsenip oqaatigaa.

Nunanullu allanut suliassaqarfiup nunatsinnut oqqunneqarneratigut oqaatsivut kulturerpullu nukittorsarneqassasut naalakkersuisut siulittaasuata oqaatigaa:

- Nunarput ineriartortissavarput, tikilluaqqussavagut nunatsinnukartut suliartorlutik siuariartortitsillutillu, kisianni uagut piumasaqaatigut tunngaviussapput, Kim Kielsen oqarpoq.

Atorfittaartut soraarummeernermi anguseqqaartassassut

Kalaallit Nunaata nunanut allanut suliassaqarfik tiguppagu naammaasiniagassat arlaqartut naalakkersuisut siulittaasuata oqaatigaa.

Sisimiuni oqaatsinut ilinniarfik toqqaannartumik ilinniarsinnaanermik akeqanngitsumik pliersitsissaaq, pisinnaaffimmi tamanna atorneqarsinnaassalluni.

Atorfittaartut oqaatsitsinnik ilinniartinneqartalissapput, atorfitillu tigummiinnarniarunikkit soraarummeernermi anguseqqaartassapput, nutserunneqarnissaminnik pisariaqarunnaartitsinissami tungaanut.

Qaqugukkut sulinermik akuersissummik tunisisisoqarsinnaanersoq pillugu ersarissunik malittarisassaliortoqassasoq, qaqugukkullu sulinissamik akuersissummik ataavartumik atuuttussamik tunisisoqarsinnaanersoq ersarissumik malittarisassiuunneqassalluni.

Kalaallit Nunaat suliassaqarfimmik Danmarkimit kingullermik tigusigami tamanna 2009-mi pivoq. Kalaallit Nunaata ilinniarnertuunngorniarfinnut akisussaaffik taamanikkut tiguaa.

Nunanulli allanut suliassaqarfik naalagaaffimmik isumaqatigiissusioqqaarnikkut nunatsinnut oqqunneqarsinnaavoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat