Kielsen naalakkersuisoqarfimmini qullersamik nutaamik atorfinitsitsisoq

Kim Kielsen naalakkersuisoqarfimmini pisortatut juunimi 2015-imiilli atorfeqartumut Søren Hald Møllerimut taartissamik atorfinitsitsivoq.

Allattoq Jens Thorin

apriilip 10-at 2019 11:14

Nutserisoq Simon Uldum

Hans-Peder Barlach Christensen Naalakkersuisut Siulittaasuata Naalakkersuisoqarfiani naalakkersuisoqarfimmi pisortatut 2019-imi juunip ulluisa aqqaneq-aappaat aallarnerfigalugu atorfinissaaq.

Hans-Peder Barlach Christensen etnografitut Aarhus Universitetimi ilinniagaqarpoq, pisortatullu Henley Management Schoolimi aamma ilinniagaqarluni. 54-inik ukioqarpoq, nuliaraalu Henriette Clasen. Marlunnik inersimasunik qitornaqarput.

Hans-Peder Barlach Christensenillu suleqatigilernissaa, pisortanilu ingerlataqarfimmi kiisalu pingaarutilimmik sulinermini sivisuumi misilittagarpassuarilersimasai atorluassallugit Naalakkersuisut siulittaasuata qilanaaraa.

- Qularinngilara, HP misilittakkani tunngavigalugit qitiusumik allattoqarfimmi kiisalu Naalakkersuisut Siulittaasuata Naalakkersuisoqarfiani aqutsinermut ineriartortitsinermullu tapeeqataalluarumaartoq, Kim Kielsen oqarpoq.

Hans-Peder Barlach Christensen Isumaginninnermut Aqutsisoqarfimmi pisortatut atorfimmeersuuvoq. Lars-Emil Johansenip naalakkersuisunut siulittaasuunerani tassunga allattaavoq, Aasianni kommunaldirektøriusimavoq KANUKOKA-milu SIK-imilu aamma pisortatut atorfeqarsimalluni.

Aamma Namminersorlutik Oqartussat ingerlatseqatigiiffiutaanni Puisi A/S-imi Kinamut puisit neqaannik nioqqutissiorfimmi pisortaasimavoq. Ingerlatseqatigiiffik taanna sivikitsumik atareerluni 2000-imi akiliisinnaajunnaarpoq.

Namminersorlutik Oqartussat tassunga atatillugu 50 millionit koruunit tungaannut annaasaqarput.

Naalakkersuisut Siulittaasuata Naalakkersuisoqarfiani naalakkersuisoqarfimmi pisortatut qinnuteqartut arfiniliupput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.