Kielsen parteeqatigisaminit sakkortuumik isornartorsiorneqaraluarluni tunuarnianngilaqAssi: KNR

Kielsen maannakkut tunuarnianngilaq

Kielsen Siumumi siulittaasuuginnassaaq. Kim Kielsen Siumumut ilaasortat marlunngornermi akunnerit arlallit ataatsimeereersut ualikkut taama oqarpoq.

Siumumut ilaasortat nuimasut arfineq-marluk Kim Kielsen partiimi siulittaasutut ataasinngormat unnukkut tunuaqquaat. Siumup inatsisartuni guruppia Siumullu siulersuisuuneri suliaq pillugu marlunngornermi ataatsimiipput.

Kielsenilu partiimi siulittaasutut tunuarniarnani ataatsimiinnerup kingorna oqarpoq.

- Uanga tunuarniuteqarnissannut maannakkut takorluugaqanngilanga, Kim Kielsen marlunngornermi ataatsimiittoqareersoq nalunaaqutaq sisamat qeqqata missaani oqarpoq.

AAMMA ATUARUK Siumut Inatsisartuni ilaasortaatitat amerlanerussuteqartut Kim Kielsenip tunuarnissaanik piumasaqarput

Siumumili siulittaasuujunnaarumaarluni oqaatigaa.

- Siumup Inatsisartuni gruppia ersareqqissaartumik novemberimi oqariaruuteqarfigivara, Siumup siulittaasussarsioqqullugit tullissaani ataatsimeersuartoqalerpat, Kim Kielsen oqarpoq nangillunilu.

- Siulersuisuni issiasinnaavunga, kisianni Siumup siulittaasuatut qinigassanngortinnavianngilanga.

Ilaasortat arfineq-marluk: Kielsen tunuartariaqarpoq

Kielsen naapertorlugu suliaq pillugu Siumup malittarisassaasa malinneqarnissaat isumaqatigiissutigineqarpoq, Siumullu nalinginnaasumik aappaagu aasakkut ataatsimeersuassaaq.

Siumumi ilaasortat nuiamasut arfineq-marluk Kim Kielsenip partiimi siulittaasutut tunuarnissaa piumasaralugu ataasinngornermi unnukkut nalunaarutigaat.

Politikerini isornartorsiuisuni arfinillit Inatsisartunut ilaasortaapput, ataaserlu Erik Jensen aatsitassanut suliffeqarnermullu naalakkersuisuulluni. Erik Jensen Inatsisartunut qinigaavoq, Naalakkersuisunulli ilaasortaagami Inatsisartunit sulinngiffeqarluni.

AAMMA ATUARUK Siumup Kim Kielsen ima uppitissinnaavaa

Taakkua Kim Kielsen ilaatigut pisassiissutinut tunngasunut qineqqusaarutit Siumullu politikkia aallaaviginagit sulinerarlugu isornartorsiorpaat. Tamannali Kielsenip akerlilerpaa.

- Ilumuunngilaq. Siumup anguniagai ataatsimoorfigaagut tassanilu anguniakkani aalisarnermuuppat, angallannermuuppat, innarluutilinnoorpat isumaginninneruppalluunniit, taakkua tamaviisa pimoorullugit sulissutigissallugit anguniassallugit Siumup siulittaasuatut pisussaaffeqarpunga. Ataatsimeersuarnermi anguniagaqarpugut taakkulu najoqqutaralugit sulivugut, aammalu naalakkersuisoqatigiit isumaqatigiissutaat naapertorlugu sulilluta, Kim Kielsen oqarpoq.

Isornartorsiuisut oqaaseqanngitsut

Kim Kielsen aamma sapaatit akunnerata siuliani sakkortuumik isornartorsiorneqarpoq. Kielsenip Ilulissani Nuummilu mittarfiliornissat pillugit siunersioqatigiinnissamut aningaasaqarnermut akileraartarnermullu ataatsimiititaliamit aggersarneqaraluarluni takkutinngimmat ataatsimiititaliami amerlanerussuteqartunit isornartorsiorneqarpoq.

Isornartorsiut Kielsenip parteeqartigisaanit Hermann Berthelsenimit ataatsimiititaliami siulittaasuusumit atsiorneqarpoq.

Tunuaqqusissummut atsioqataasut Erik Jensen, Hermann Berthelsen Anders Olsenilu Kim Kielsenip marlunngornermi ataatsimiinnermi akissutai pillugit KNR-imit apersorniaraluarpagut, arlaleriarlutalu attaviginiartaraluarlugit iluatsissinnaasimanagu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat