- Unammillernartoq tassaavoq Inatsisartut gruppiat ataatsimoortissallugu, Kielsen oqarpoq.Assi: KNR

Kielsen: Inatsisartuni gruppi ataatsimoortikkuminaappoq, immikkoortortaqarfiillu peqataanerusariaqarput

Siumut siulittaasussaminik sapaatiuppat qinersissaaq. Siulittaasunngorniuttut pingasuupput - taakkuali sunik qineqqusaaruteqarpat? Kim Kielsenip akissutai uani atuakkit

Siumut aqagumit ataatsimeersuassaaq. Partiilu siulittaasumik siulersuisunillu sapaatiuppat qinersissaaq.

Vivian Motzfeldt, Kim Kielsen Erik Jensenilu siulittaasunngorniuttuupput.

Kim Kielsen, sooruna Siumumut siulittaasunngorniarlutit sassarpit?

- Tassa peqqinnera nalilersorsimavara, suliaritereernerma kingornatigut siumut aallarnikuugami. Tassa aamma nunatsinnut suli tunniussassaqarsinnaallunga isumaqarpunga.

AAMMA ATUARUK Erik Jensen: Nunarput ataatsimoortitsisinnaasumik siuttussaalatsivoq. Uanga sapiutinngilanga.

Partii Siumut nunatsinni partiini anginerpaagami immikkoortortaqarfippassuaqarpoq. Immikkoortortaqarfiillu arlallit peqataatitsinerusumik siulittaasoqarusullutik KNR-imut siusinnerusukkut oqarput.

Siumup ataatsimeersuarnissaa

 

  • Siumut tallimanngorpat ataatsimeersualissaaq. Partiimeersut 70-it missaat Nuummi peqataassapput.

 

  • Ataatsimeersuarnermi oqaluuserisassat naatsumik:

 

  • Tallimanngorneq: Ataatsimeersuarneq workshoppernertalimmik ammarneqassaaq.

 

  • Arfininngorneq: Partiip anguniagai pillugit oqallinneq.

 

  • Sapaat: Oqallinneq, naatsorsuutinik saqqummiineq, siulittaasumik siulersuisunillu qinersineq.

 

  • Ataatsimeersuarneq knr.gl-imi KNR2-kkullu toqqaannartumik sapaatiuppat ullukkut nalunaaqutaq ataatsimiit aallakaatinneqassaaq. 
     
  • Siulittaasumik qinersineq nunatsinni politikkikkut aqutsinermut pingaaruteqaqimmat, minnerunngitsumillu kina Naalakkersuisunut siulittaasuussanersoq ersertussaammat - ataatsimeersuarneq toqqaannartumik aallakaatinneqassaaq

Qinigaaqqissaguit partiimi aaqqiinissannut qanoq eqqarsaateqarpit?

- Tassa aaqqitassaqarpugut. Immikkoortortaqarfiit peqataanerusariaqarput. Aamma immikkoortortaqarfiit siulersuisuunerillu suli qaninnerusumik suleqatigiisillugit nukittorsartariaqarpagut.

Kim Kielsen partiimi 2014-imiit siulittaasuulerpoq. Partiip Naalakkersuisullu siulittaasuattut atuunnermini arlalippassuariarluni suleqatikkuminaannerarlugu matoqqanerarlugu isornartorsiorneqartarpoq. Tunuliaquttaminulli tunniusimaniarpoq.

Siulittaasutut suut marluk pingaarnerpaatillugit sulissutigissavigit?

- Pingaarnertut partiimut unneqqarinneq tunniusimanerlu. Siulersuisunut ataqqinnineq tassa pingaartitakka.

- Siumut imaanngilaq Inatsisartut gruppiat. Kisianni Siumut inoqarfinni tamani aamma nunaqarfinni aqutsisuni kommunalbestyrelsenilu ilaasortaqarpoq.

AAMMA ATUARUK Vivian Motzfeldt: Siulittaasunngussaguma tusarnaartuullungalu naaperiaasassaanga

Kim Kielsen partiimi Inatsisartuni gruppia ataatsimoortikkuminaatsuusoq nassuerpoq.

Partiimit Inatsisartunut ilaasortat arfineq marluk siulittaasortik siorna aggutsip qaammataani tatigiunnaarlugu nalunaarput, Kim Kielsenili ataatsimeersuarnissap tungaanut siulittaasuginnarnissaanut taperserneqarpoq. Aamma Inatsisartuni tatiginninnginnermik marloriarluni taasissutigineqarpoq.

Kingullermik siulittaasunngorniartuni Erik Jensen taaseqataanngilaq Vivian Motzfeldtilu taaseqataannginnissamik isumaliuuteqareerluni tatiginnilluni taasivoq.

Siulittaasuunerni ukiuni kingullerni suut unammillertartuuppat?

- Unammillernartoq tassaavoq Inatsisartut gruppiat ataatsimoortissallugu. Taanna nukinnik annertuupilussuarmik atuiffiuvoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat