Atassutip naalakkersuutitai marluk, Aqqalu Jeremiassen aamma Siverth K. Heilmann, naalakkersuisunut ilaasortaajunnaarput. Asseq toqqorsivimmitAssi: KNR

Kielsen Atassutip tunuarnera pillugu: Allatut ajornaqaaq

Atassut Kim Kielsenimit qoqassineqartutut misigisimavoq. Partiimmi naalakkersuisoqatigiinnit tunuarluni pingasunngorpat aatsaat nalunaarutiginiaraluarpaa, Kielsenilli Inatsisartut oqaluttarfiannit marlunngornermi ullaap tungaani tamanna nalunaarutigaa.

Kim Kielsenip (S) oqaatigaa Atassummit ippassaq unnukkut attaveqarfigineqarluni, partii naalakkersuisoqatigiinnit pingasunngorpat tunuarniartoq. Kielsenilli tamanna ullumi marlunngornermi nalunaarutigaa:

- Politikkimi torersumik ingerlatsissagaanni allatut ajornaqaaq. Uattut Naalakkersuisut siulittaasuattut akisussaaffik tigullugu, soorunami taamatut nalunaarfigineqarnera malittaralugu iliuuseqartariaqarpunga, Naalakkersuisut siulittaasuat Kim Kielsen (S), ullormi nunatsinni politikkikkut pisoqarfiulluartumi taama oqarpoq.

Atassut naalakkersuisoqatigiinnit tunuarpoq, partiillu naalakkersuisuutitai marluusut, Aqqalu Jeremiassen aamma Siverth K. Heilmann, taamaalillutik naalakkersuisunut aamma ilaasortaajunnaarput.

AAMMA ATUARUK Atassut: Ikinnerussuteqarluni naalakkersuisooqatigiinnit aninerput nuannaarutigeqaarput

 

Paasissutissat

  • Aqqalu Jerimiassen (Atassut) Inuussutissarsiornermut Nukissiuuteqarnermullu naalakkersuisuugaluarpoq.
  • Inuussutissarsiornermut Nukissiuuteqarnermullu naalakkersuisoqarfik ineqarnermut attaveqaqatigiinnermullu naalakkersuisup Karl Frederik Danielsenip (S) akisussaaffigigallassavaa.
  • Siverth K. Heilmann (Atassut) Pinngortitamut, Avatangiisinut Ilisimatusarnermullu naalakkersuisuugaluarpoq. Naalakkersuisut siulittaasuata Kim Kielsenip avatangiisinut ilisimatusarnermullu naalakkersuisoqarfiit akisussaaffigigallassavai.
  • Nikkulaat Jeremiassen (S) aalisarnermut, piniarnermut nunalerinermullu naalakkersuisuugaluarpoq. Aatsitassanut suliffeqarnermullu naalakkersuisup Erik Jensenip (S) naalakkersuisoqarfik akisussaaffigigallassavaa.

- Sooruna neriuuteqarfigaakka uani naalakkersuisooqatigiit isumaqatigiissummik atsioqatigiinikuummata aamma suleqataammata. Aamma soorunami naatsorsuutigaakka siunissami suleqataassasut. Taamaattorlu uani aalajangernerat, tassa aappaat ingerlappata, aamma aappaa ingerlassooq. Taanna uggornarpoq, Kim Kielsen oqarpoq nangillunilu:

- Allatut ajornaqaaq tunuarniuteqarunik. Tassami tunuarniutertik oqaasiinnartigut apuussaat, taava piviusunngortittariaqarpara.

Aalisarnermut naalakkersuisoq Nikkulaat Jeremiassen (S) ullumi aamma tunuarpoq.

Nikkulaat Jeremiassen Aqqalu Jerimiassenilu piffissami kingullermi assoralisimaangaatsiarput.

Nikkulaat Jeremiassen qaleralinnik aalisapiluttoqarnera pillugu tusagassiorfinnut qinikkanullu assigiinngitsunik nassuiaateqarsimasutut isornartorsiorneqarpoq. Inatsisartut aalisarnermut ataatsimiititaliaata taama nassuiaateqarsimanera isoralugu naalakkersuisoq tatigiunnaarlugu sapaatit akunnerata siuliani nalunaarutigaa.

AAMMA ATUARUK Atassut naalakkersuisoqatigiinnit tunuarpoq, Jeremiassenilu naalakkersuisutut aamma tunuarluni

Aamma Inuit Ataqatigiit, Demokraatit Partii Nalerarlu naalakkersuisoq tatigiunnaarlugu nalunaaruteqarput.

Aqqalu Jerimiassen nunarsuup silaannaata kissakkiartornerata inunnit pilersitaanera upperinagu Sermitsiaq.AG-mut sapaatit akunnerata siuliani oqaaseqarnini pillugu isornartorsiorneqangaatsiarpoq.

Tamannalu pillugu Demokraatit, Inuit Ataqatigiit Partii Nalerarlu naalakkersuisumut tatiginnikkunnaarlutik aamma nalunaaruteqarput.

Atassut Inatsisartuni marluinnarnik ilaasortaqarpoq, partiilu naalakkersuisoqatigiinnit tunuaraluartoq Kim Kielsenip naalakkersuisoqatigiivi suli amerlanerussuteqartunit tapersersorneqarput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat