Kielsen appanut tunngatillugu iliuuseqarniarpoq

- Appat eqqartorneqartupilussuupput, minnerunngitsumik ikiliartuinnarnerat pissutigalugu. Taamaammat massakkut iliuuseqartoqartariaqarpoq.

Avatangiisinut naalakkersuisup Kim Kielsenip (S) tamanna erseqqissumik oqaatigaa. Siunnersuuteqarniarpoq, Inatsisartunili aalajangiiffigineqassaaq.

- Qanoq iliortoqarnissaa Inatsisartut aalajangiiffigissavaat. Uumassusilinnik ilisimatuut kaammattuutigisaattut eqqissisimatitaassappat, imaluunniit piniagaanerat sivikillineqassava? Massakkutummi ingerlaannartoqassappat appanut ajorluinnartumik kinguneqartussaavoq. Kim Kielsen oqarpoq.

Appat ukiumut ataasiinnarmik marlunnilluunniit manniliortarnerat, aatsaallu tallimanik ukioqaleraangamik manniliortarnerat tikkuarpaa. Appat siornatigutut amerlassuseqalersinnissaat aamma sivisussaaq.

Periarfissat marluk maanna isumaliutigai, taakkulu pitsaanerusumik saatsitsinissamut appallu amerliartoqqilernissaannut iluaqutaasinnaanissaat neriuutigaa.

- Uumassusilinnik ilisimatuut ukiuni qulini eqqissisimatitsinissamut periarfissaq eqqaavaat, aamma piniagaanerisa sivikillineqarnissaanut periarfissaqarpoq, pissutsimmi maannakkut pitsaasuunngillat, Kielsen oqarpoq.

Iliuuseqartoqartariaqartoq Naalakkersuisup erseqqissarpaa. Namminerlu inuttut isumaqarpoq piniarneq unitsivissornagu sakkortuallaanngitsumillu aaqqissuussisoqartariaqartoq.

- Uumasunik piujuaannartitsinissamik tunngaveqarluni piniarnissaq pineqarpoq. Aamma inuit eqqarsaatigineqartariaqarput. Taamaammat appanniarnerup sivikillineqarnissaa orniginartinnerua, taama oqarpoq.