Kiattup anorersui siunissami sakkortunerulissapput

Ulussaarsuit kiattullu anorersui, Caribiami USA-milu ulluni makkunani takkusimaaleruttorput, qarsutsinernik aseruatitsinernillu nassataqarlutik. Amerikamiut nalunaarusiaani maanna atuarneqarsinnaalerpoq, nunarsuarmi silap kiatsikkiartornerata kinguneranik, kiattup anorersui siunissami sakkortunerulissasut.
Allattoq Louise M. Kleemann
septembarip 04-at 2008 07:43

Nunani kiattuni, kiattup anorersuisa pinngorfigisartagaanni, immap kissassusaa gradimik ataasiinnarmilluunniit qaffariarpat, anorersuit sakkortuut pingajorarterummik amerleriassasut nalunaarummi oqaatigineqarpoq.

Amerikamiut ilisimatusartuisa nunarsuatsinni imarsuit anginerit qaammataasaniit 1981-imiit 2006-imut assilineqarneri misissoqqissaarsimavaat, aamma anorersuit amerlassusii sakkortussusiilu immap qaavata kissassusaanut sanilliussimallugit.

Misissuinerup ersersippaa, anorersuit amerleriarnavianngitsut, kisianni anorersuit takkuttartut sakkortunerulissasut. Nalunaarummi ersersinneqarpoq, immap kissassusaa gradimik ataatsimik qaffariarpat, kiattup anorersui, sakkortuutut oqaatigineqartartut, pingajorarterummik amerleriassasut.

Naalagaaffinni Peqatigiinni silap pissusaanik ilisimasallit oqaatigaat, ukiuni hunnorujulikkaani maanna atukkatsinni nunarsuatsinni kiassuseq 2 imaluunniit 4 gradimik qaffariassasoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq