Kiattup anorersua Sally USA-mut angummat orpiit teqqartut qarsutsineqarlunilu
Kiattup anorersuata Sallyp Alabamami Floridamilu qarsutsitsinera USA-mi nuna tamakkerlugu ulussaarsuarnik misissuisoqarfiup NHC-p aatsaat taama ajortigisutut taavaa.
Orpiit sorlai ilanngullugit anorersuarnerani teqqarput, aqquserngit qarsunneqarput aamma angerlarsimaffippassuit pisiniarfippassuillu innaallagiaarupput.
Kiattup anorersua Sally Alabamamut pingasunngornermi ullaakkut annguppoq.
Meterip affaata missaanik siallertoq
Kiattup norersua Sally USA-p nunavittaanut anngunnermini sakkukilliartorpoq, ualikkut sakkukinnerulerami nalunaaquttap akunneranut 113 kilometerisut sukkassuseqalerluni.
USA-p kangerliumarngata ilaani ullup ataatsip ingerlanerani meterip affaata missaanik siallerpoq. Anoraalu sakkukilliartoraluartoq sialliinnarnissaa naatsorsuutigineqartariaqartoq, NHC ilisimatitsivoq.